ومازلت عانس

وانا بصفتى انثى وعانس مع مرتبة الشرف احب اتكلم فى موضوع قليل جدا من الناس يهتم بيه

كل الاحصائيات تؤكد ان عدد الرجال العوانس ضعف عدد الاناث والغريبة ان محدش اثار الموضوع دة

وليه عدد الشباب العانس اكبر بكتير من الاناث ومع ذلك اى عريس بيتعامل مع البنات على ان البنات على قفا مين يشيل واسأل اى شاب حيقول لك كدة

وفعلا البنات دلوقتى مش زى ايامى زمان . . البنات دلوقتى ما بتصدق اى جواز لانهم عارفين ان فيه مشكلة جواز ولازم تلحق القطر

طيب لو المشكلة كلها مشكلة مادية فقط كان زمان كل البنات العوانس اتجوزوا ويفضل الباقى من الشباب الفقير اللى مش لاقى فلوس يتجوز بيها

لكن الواقع غير كدة خالص

الواقع اللى كلنا شايفينه ان اغلب العوانس من البنات والرجال من الطبقة المتوسطة والعليا وفيه رجال كتير ومعاهم فلوس وممتنعين عن الجواز

وفى نفس الوقت الرجال المتزوجين عندهم استعداد يتجوزوا اتنين واربعة

مش غريبة المشكلة دى

وكل الحاجات اللى انا بقولها دى مش لافتة نظر حد وكل اللى بيتقال المهور والفلوس هى المشكلة فى الجواز

وطبعا محدش عاوز يجيب العيب غير فى البنات وطلباتهم واهاليهم وطمعهم كإن يا حرام الرجالة دول مظلومين على طول ومالهمش ذنب

وانا فى نظرى كعانس وعايشة فى عمق المشكلة اقدر اقول ان المشكلة فى الرجالة

ايوة دى الحقيقة اللى محدش عاوز يعترف بيها

مفيش رجالة يا جماعة وكل دى حجج فاضية عشان نغطى على المشكلة وندفنها فى التراب ويحلها ربنا

كل الكلام اللى بيتقال كلام فارغ لان مفيش اب ولا ام فى الايام دى بيطلب طلبات زيادة بالعكس بيتنازلوا تنازلات لا حصر لها وكمان يتمنوا بس ان العريس يكمل ومايروحش

هى دى الحقيقة بدليل فى الستينات كانت الناس برضه فلوسهم على القد ومع ذلك كانوا بيفتحوا بيوت باقل الامكانيات

دلوقتى اى شاب بيفضل يتفرج على البنات على النت او يصاحب بنات عندها استعداد لعمل اى شيء عشان تحس انها انثى ومطلوبة

ومن غير ما يدفع فلوس ولا التزامات ولا بيت ولا عيال ولا خطوبة ولا وجع قلب

طالما بيلاقى بنات مستعدة فى اى وقت يتجوز ليه ( دة نوع من الرجال اللى بيهرب من المسئولية) وفيه نوع تانى للاسف موجود بكثرة جدا

مالوش فى الجواز اصلا وبيدارى الكلام دة بانه مش بيعجبه اى واحدة ويروح ويتقدم ويتفرج ويخطب كمان وهو عارف انه مش حيكمل

المشكلة ان مفيش رجالة  . عددهم كبير جدا اكثر من البنات لكن عدد الرجال قليل جدا جدا

وفى النهاية انا عن نفسى كبنت عانس ملتزمة تخاف ربها لا يمكن اعمل علاقة محرمة عشان اكون سعيدة لانى مش حكون سعيدة ولا اقدر اتجوز والسلام واعيش فى جحيم

واخترت بكامل ارادتى وبكامل قواى العقلية انى اكون عانس