الحب هل له وجود؟

 الحب هل له وجود؟

اعتقد ان أى واحدة فى الدنيا بتدور عن الحب ومتهيألى كل رجل بيبحث عن الحب

والسؤال هل فعلا فيه حاجة اسمها حب والا دة وهم منذ بدء الخليقة مخلوق مع الانسان والا دة حلم مثالى كل انسان يتمناه وعمره ما يلاقيه

طول عمرى كنت فاكرة ان فيه حب فى الدنيا وان من حق اى انسان يحب وانه شعور انسانى لا نخجل منه بل بالعكس دة معناه ان الانسان عنده احساس وقلبه سليم ينبض بالحياة.

كل الكلام دة كنت مؤمنة بيه لحد وقت قريب. وتعبت من البحث وكانت النتيجة كالتالى

العمر بيجرى وانا اجرى وابحث وادور والعمر سبقنى لحد ما بقيت واحدة من أهل الكهف بمعنى

اهل الكهف دول اولاد فى سن ال16 دخلوا الكهف من خوفهم من الدنيا والظلم وطلعوا من الكهف بعد 300 سنة قلبهم لسة عنده 16 سنة لكن عمرهم 316 سنة وهما مش حاسين بالعمر دة كله

ولا قادرين يعيشوا فى زمن مش زمنهم ولا قادرين يرجعوا يعيشوا فى زمنهم انا حاسة بيهم اوى وحاسة انى منهم وحاسة انى لو قابلتهم هعرفهم وهيعرفونى

المهم انى ضيعت عمرى وبعد ما خرجت من الكهف نقول بعد 40 سنة عرفت انى بقيت فى زمن غير زمنى وكمان عرفت المصيبة الاكبر ان مفيش حب وانه وهم كبير جدا كلنا مصدقينه عشان عاوزين نصدق . عاوزين نصدق لانه الشيء الوحيد اللى مخلينا نحلم ونتمنى .

الصدفة عمرها ما تيجى ولا ينفع اننا نرتب حياتنا على صدفة يمكن تحصل ويمكن متحصلش واحتمالها ضعيف جدا للاسف

دلوقتى اقدر اواجه الحقيقة واقولها على الملآ ولا اخاف ولا اتكسف

انا يا جماعة من ضيع فى الاوهام عمره دى الحقيقة ... معادش فيه كسوف ولا باقى فى العمر قد اللى فات .... امتى حنواجه نفسنا؟

ودخلنا فى مشكلة العنوسة ودى مشكلة محدش يحس بيها الا صاحبتها .... اكيد مكنتش اتمنى اكون كدة ولا اى واحدة تتمنى كدة

لكن هو دة قدرى اللى ساهمت فيه بتفكيرى وبحثى عن الوهم الكبير....

نرجع لموضوعنا موضوع الحب هل له وجود..... محدش جاوبنى نفسى حد يقول لى تجربة حقيقية فى الدنيا حب + اخلاص

ياريت لو حد عنده كدة يقول وانا متأكدة ان مفيش كدة فى الدنيا ... دى امنية من امنبات الجنه

وصدق او لا تصدق انا غير نادمة على شيء ... ودة مش كبر ولا غرور حاشا لله

لكن يكفينى انى لم اخدع أحد ولم اجرح مشاعر احد ولم استغل انسان للوصول لأهدافى من زواج وبيت واولاد وانا لا اكن له اى احساس او مشاعر يعنى هو مجرد وسيلة لتحقيق حياتى لكن مالوش هو وجود فى قلبى

يكفينى انى مضحكتش على قلبى ولا نفسى واقنعت نفسى بحد محبتوش ... ويكفينى انى قدرت بعد تجربة العمر كله اقف على رجليا واقول لنفسى وفى عينى انتى ضيعتى عمرك هدر ودى شجاعة افخر بيها

يكفينى انى قدرت اعيش وحدى كل العمر دة من غير ما اغير مبادئى وغيرى تخلى عن مبادؤه من غير مقاومة

يكفينى احترامى لذاتى

انا مش حزينة لانى عانس دة اختيارى .. لكن حزينة انى كنت بدور عن سراب.