السلام عليكم
دى اول مدونة لى فى هذا الموقع و ارجو انها تكون جيدة
حبيت انى اكتب عن حاجة مهمة بنشوفها كل يوم و بتأثر فى حياتنا اليوميه وهى ازاى نختار اصدقاؤنا
فى ناس بتختار اصحابهاعن طريق التعود يعنى كان يعرفه او تعرفها فى الفصل و بقوا اصدقاء
"زميل دسك يعنى" و فى ناس تانية اختارت صحابها عن طريق المنطقه السكنيه يعنى صديقى ده ممكن يكون جارى او اى حد قريب من مكان سكنى
و غير كده فى اكتر من طريقه ان الواحد يختار صحابه
لكن كان فى كتاب اسمه كيف تختار اصدقاؤك و تؤثر فى الناس و عايزكو كلكو تركزوا فى "تؤثر فى الناس" على حد علمى مفيش حد بيحب انه ميقدرش يأثر فى الناس و الكتاب ده تأليف الكاتب "ديل كارنيجى" ..... ماعلينا ...... المهم ان الأخ كارنيجى ده كان ليه بعض النصائح الجميله فى فن التعامل مع الآخرين وازاى تكون محبوب بين الناس وأول حاجه قال عليها الكاتب "الأبتسامه"وفى الآول الكاتب قعد يقول المفتاح السحرى -انا قولت الراجل اخترع حاجة جديدة احنا مش عارفنا بس انا كنت مندهش لما اتكلم عن الآبتسامه-بالمناسبه الرسول عليه الصلاة والسلام قال عن الموضوع ده من زمان "تبسمك فى وجه اخيك صدقه" ولكن الواضح ان احنا بنحب نجيب ناس من بره علشان يقولولنا كلام احنا عارفينو كويساو زى مابيقولو الشيخ البعيد سره باتع-مصدقتش نفسى و بينى و بينكو كنت عايز اقفل الكتاب و ارميه من البلكونه بس لما كملت قرأة فى الكتاب ده وجدت حاجات مفيدة جدا احنا بنتعمد فى حياتنا اليوميه اننا نتجاهلها ..... عارفين يا جماعة ان انت لما تقابل واحد و انت مبتسم هيظل يتذكرك بصورة الابتسام دى فترة طويله و هيكون انطباعه عنك ايجابى.
و على فكره ده مش كلام كده وخلاص انا بجد جربت الكلام ده مع ناس فى الكليه مكنش لى علاقة معاهم اوى بس عارفين اول ما ابتسمت فى وشهم ردولى الابتسامة بسرعة و حسيت ان انا دخلت قلبهم بسرعة بجد تخيل ان الابتسامة ممكن ماتخدش دقايق او ثوانى على وجهك بس شوف تأثيرها عامل ازاى ..... تأثير كبير ... انت عارف لما هتبتسم ده بيخلى اللى امامك بيحس انك سعيد علشان شوفته وده سر كبير مع انه سهل بس احنا بنبخل بيه فى اوقات كتير و على اقرب الناس لينا
وللحديث بقيه ان شاء الله......................
يارب المدونه تعجب الناس..................... im20