Mashy.com Blog Beta

امبارح رحت المدرسة والمدرسة  ال اتنقلت فيه جديد مستوى الولاد فيها منخفض للغاية ودايمابحاول اكتشف السلبيات ال محيطة بالولاد او ال موجوده فيها واحاول اقومها او اعالجها بقدر استطاعتى ومعرفتى

ولما دخلت اول حصة  قلت للولاد يا ولاد  لازم كل واحد يذاكر مش علشان ينجح  وبس لكن علشان كون مستقبل ويكون دور بالحياة والمجتمع انشاءالله خصوصا فى ايامنا  الصعبة دى  يعنى كل واحد يكون عنده هدف يكون مثلا دكتور او مهندس او محامى او مدرس او ظابط .فرد عليا ولد وقال:

هههههه هو فيه شغل دلوقت يا ابله شوفى بأه اامنا هيكون فيه ايه

ورد ولد تانى وقال انا بابا متعينش للوقت ده يقاله اكتر من 16 سنه

ورد ولد تالت وقال اختى اقتصاد وعلوم  سياسية وخلصت وقاعده بالبيت بقالها خمس سنين

هنذاكر ليه يعنى وهيكون هدفنا ايه بأه 

بصراحة انا معرفتش ارد عليهم واقولهم ايه قلت لهم طيب  هنشرح درس انهارده  خلينا بالدرس  وشرحت لهم عن بعض المواد الضارة  لجسم الانسان زى المواد الملونه الصناعية والمواد الحافظه ال بتوجد فى كثير من الحلويات ووغيرها من المعلبات او  غيره

فرد  عليا ولد برده وقالى

الله  طيب يا ابله ما الخضار والفاكهه ال بناكلها فيها مواد مسرطنه هى جات يعنى  على الحلويات الملونه واكياس الشيبسى والكاراتيه والمواد الحافظة

بصراحه كانت حصه تقيلة اوى على قلبى وجالى ذهول من ردود فعل التلاميذ عندى واد ايه طفل عنده 12نه ويكون عنده الياس ده من   مستقبله وكل حياته

ازاى يكون ياس حتى من النصائح  حتى من السلبيات المحيطة بيه حتى من اى امل

يا ترى مين ال علم ولادنا اليأس والضياع بدل ما يعلمهم حب العلم

يا ترى مين ال علم ولادنا الخضوع وضعف الاراده بدل ما يعلمهم حب التغيير والاصلاح

وخرجت من الحصة وانا حاسه بنفس الياس ال حسيته فى تلاميذى وسرحت بتفكيرى بعيد وحاولت احلم بحلم جديد او امل جديد يصبرنى واقوله بيه ان بكره جاى احلى  .....لكن ردود فعل تلاميذى وكلامهم موت كل حلم جوايا بمستقبلهم

ولم يتردد فى ذهنى الا دعاء يقول

فأذا ضاقت بى فان قولى

حسبى الله ونعم الوكيل