ينفع الحاجة اللي المفروض تكون مصدر للسعادة
تكون مصدر للألم
آه ينفع ...... الحب كدا.
هو الحب كدا حاجه أرهقت كل اللي جرب يفكر فيه وكان دايما ماده دسمه للروايات والأفلام وحتى صفحة الحوادث
هو كدا الحب أتكلم عنوا بس وأنتا قاعد كدا مع أصحابك وتخيل اللي هايحصل . كل واحد عنده رأى وكل واحد شاف الحب بطريقه مختلفة في اللي عايش بسعادة وفى اللي أنجرح وطبعا كل واحد منهم هايكون عندوا كلام مختلف بس أكيد يوم ماتيجى تتكلم على الحب هاتلاقى ناس كنير تسمعلك وتشاركك لانوا موضوع مافيش حد ماعندوش رؤية فيه مش الكل إنكوا بناره لكن مافيش حد ماحلمش بيه .
وخاصة إننا أتربينا وكبرنا على قصص وأساطير صورت لنا الحب دا على إنوا شيء خيالي فوق احتمال البشر مجرد ما تلاقيه كل حاجه هاتكون جميله وما فيش مشكله وملهاش حل ، دا اللي إحنا أتربينا عليه من قصص روميو والحاجة جوليت ولا عمنا قيس وبنت عمه ليلى هانم ولا من ادهم صبري ومنى ولا الأفلام الامريكانى ربنا يسامحها لعبت في دماغنا جامد وصورت لنا الحب بطريقه خياليه وان الفارس على حصانه الأبيض لسه موجود ورفعت شعار امشي بس في الشارع وأنتا هاتكعبل في حب حياتك وتوأم روحك....
كلام جميل والله بس دا كلام سينما وروايات لكن الحياة الحقيقية غير كدا خالص والحب كمان غير كدا خالص سبكوا من الحب الشاعري الاسطورى زمنوا خلص خلاص وكمان ابطالوا ما يقدروش يعيشوا في زمنا دا لان الوقفة في طابور العيش أكيد هاتقتلهم .
الحب الواقعي حاجه مختلفة عن اللي بنشوفوا في الأفلام ممكن يكون أكثر واقعيه واقل رومانسيه وممكن كمان يكون أعظم وأروع من إن اى فيلم يقدر يجسدوا بس هو أكيد مختلف .
اولا في ناس هاتسألنى هو في حب حقيقي في زمنا دا هاقولكوا اه فيه صحيح نادر زى رغيف العيش أبوا خمس قروش بس موجود حسب تصريحات الحكومة ، ازاى نلاقى الحب دا حاجه سهله بس ازاى ممكن تحافظ عليه هي دى بقى الحاجة الصعبة زى نظرية الوصول إلى القمة واللي بيكون سهل لكن الأصعب الحفاظ عليه علشان كدا الحب الحقيقي صعب يعيش بسهوله وينمو ويزدهر من غير ما يقابل كنير من المشاكل والعقبات والكوارث في بعض الأحيان ، وكلها بتوقف في وش الحب وبيكون همها الوحيد أنها تقتله أو حتى تعطل مسيرته اى حاجه المهم إنوا مش لازم يستمر . عارفين ليه لان هى الدنيا كدا وظيفتها إنها تسرق أحلامنا وتدمرها قدام عينا واكبر حلم عند الإنسان هو الحب الحقيقي في احلي صوره واسمي معانيه والدنيا أول ماتشوف أتنين قدروا يلاقوا الحب الحقيقي بتتجنن ومش بتسكت غير لما تقوم بوظيفتها وعلى أكمل وجه . مش مصدقنى طيب رجعوا كدا التاريخ اللي كبرنا على قصصوا معايا روميو وجوليت لقوا الحب الحقيقي وحاربوا الدنيا كلها علشان يعيشوه لكن القدر كان ااقوى ومارتحش غير بموتهم وقرارهم أنهم يكملوا حبهم في عالم تانى والامثله على كدا كنير انتوا عارفينا اكتر منى وكمان ممكن تكونوا عشتوها بنفسكوا ، وإذا كان في حد بيعيش دلوقتى في قصة حب حقيقي بقولوا خلى بالك الدنيا مش هاترحمك .
طيب إيه هي العقبات اللي بيحطها القدر في طريق حبنا وبتأدى لضياع الحب دا هي حاجات كنير وبتختلف من كل حاله للتانيه.
زى عدم الثقة أو الشك القاتل واللي بيأدى دايما لسوء الفهم والخلافات المستمر وكمان فيه وجود الطرف التالت والطرف التالت دا شخص بيكون هو كمان بيحب بطل أو بطلة القصة ودا بيخلق عندوا نار ... نار قاتله ممكن يكتمها جواه وساعتها هاتقتلوا وممكن تديلوا قوه علشان يدمر الحب اللي قداموا حتى لو ماوصلش لهدفوا وهو إن الشخص اللي بيحبوا يبادلوا حب بحب بس كفاية عليه إنوا مايشفوش مع حد تانى دى حاله ، وكمان في العدو القاتل قدام الحب وهى الظروف وهى كلمه مكررة بنسمعها كنير بس فعلا في كتير من الظروف بتوقف قدام الحب ومش كل الناس تقدر تواجها او إن الحبيبين يهربوا ويتجوزوا زى مابيحصلش في الأفلام أو في حالات نادره في حياتنا ، والظروف دى ممكن تكون ظروف ماديه أو إجتماعيه أو إن الأهل مش موافقين على الارتباط دا أو عامل بعد المسافة اللي ممكن يضعف اى حب حتى لو كان حقيقي او حاجات تانى كتييييييييير مش بقولكوا حياتنا مش زى الأفلام .
وكل العوامل دى بتأدى لحاجه واحده إن الحب اللي المفروض إنوا يكون اقوي مصدر للسعادة يتحول في لحظات ويكون مصدر للألم .. كل الألم وفى اكتر من ألم القلب ما اعتقدش !!
هاقولكوا إيه ابعدوا عن الحب هو دا أفضل علاج.. ماينفعش الحب قدر وأمر حتمي فعلا ممكن تتكعبل فيه وانتا ماشى ...
طيب هاقولكوا سبكوا من كل علامات التحذير وادخلوا وانتوا قلبكوا جامد.. برضوا صعب جروح القلب مالهاش علاج
امال إيه الحل .... مع الحب مافيش حل لازم تعيشوه بكل ألموا وسعادتوا هاتنجرح ممكن هاتعيش أجمل لحظات حياتك أكيد لكن انك تعيش من غير حب يمكن بجد هو دا الشعور القاتل لان القلب اللي ماتغسلش بدموع الفرح والحزن ومادقش بسرعة من فرط السعادة أو من قسوة الألم هو قلب ميت.
الحب أجمل شيء ربنا وهبوا للإنسان علشان يسعدوا أو يكون سبب نهايتوا بس لازم نعيشوا دا قدرنا ولا اييييييييييه
أسبكوا بقى وصلت للأسف بس هاجيلكوا تانى دا وعد منى
على جنب بقى يأسطى ..... سلااااااااااام
التعليقات
الله يلعن الحب
الله يلعن الحب وسنينة
فيه حاجات كتير أهم من الحب اليومين دول
أولا الحصول على وظيفة أو عمل
ثانيا ببناء المستقبل
ثالثا رد الجميل لأسرتنا التى طفحت الدم لتربيتنا وتعليمنا
بعد كده سيظهر الحب فى حياتنا دون الحاجة للبحث عنه عبر الشات أو على النواصى
أجعل فى حياتك هدف وكافح للوصول إليه
تحياتى للحبيبة
والله احسن حاجه
والله احسن حاجه ان الواحد لايحب ولا يوجع دماغه ولا يروح لنهايته والسبب في تعاسته برجليه هو النهايه معروفه 2حبيبه اتفرقوا يااما بظروف الحياه او بارادتهم المهم هيتفرقوا يعني هيتفرقوا ويعيش كل طرف علي ذكره التاني تعيش حزين شايل هموم الدنيا علي دماغه ويندم علي اليوم الي اتولد فيه ويكره الدنيا والي فيها انا محبتش قبل كده ولا هحب وبحب حاليا عايشه سيباها علي الله تيجي زي ماتيجي واهي ماشيه لاحد بيقولها انتي رايحه فين ولا جايه منين (الدنيا يعني) وسلامي بئه لكل 2بيحبوا بعض ولكل ضحايا وباء الحب وربنا يعين