السلام عليكم ورحمة الله وبركاته

يارب تكونوا بخير كدة والف صحة وسلامة وسلامى للكل واحد وواحدة واحدة

بعد رحلتى الجميلة  من مدينة العجائب (( المدينة الجامعية ))  اللى هيا من اكبر غلطات حياتى اصل انا فى رابعة المهم طول عمرى مقضياها مواصلات قولت ايه يابت متقعدى هناك عشان تذاكرى كويس خليكى تخلصى وتتجوزى بقى اللى انتى مخطوباله دة ..المهم طلعت مبعرفش افكر كالعادة وطلعت رميت نفسى فى بؤرة الفساد

اولا المكان طبعا نضيف جدا والبنات انضف والاكل انضف وانضف والريحة مفيش بعد كدة وفى الاخر الحمامات يا سلام على جمالها ...!!

سيبكوا من كدة اللى بيجرى بالليل دة بقى كوم تانى خالص مالص .. البنات بتتعمد (اه مقلتلكوش ان مدينة الولاد محوطانا بينا مفيش غير سور صغير فرق بينا وبينهم) بتتعمد تقف فى الشبابيك تشاور للولاد وتضحك ضحكات اخر مسخرة وقلة ادب وتزغرط وترقص وحاجات العن واضل ..

واجمل حاجة المشرفات يا سلام يا سلام ... مش مشكلة المهم ان انا اتعلمت الادب ورجعت بيتنا تانى

المهم انا اول يوم روحت المدينة كنت مذهولة بقول دول بنات الريف يا نهار منا اصل من بلد تعتبر فلاحين يعنى معدش فى اخلاق ولا ادب

انا لله وانا اليه راجعون

ما علينا سيبكوا من دول ..انا بس حبيت اقول عشان اى واحدة بتفكر تسكن فى مدينة تفكر ميت الف مرة الا اذا كانت مضطرة بقى ربنا يكون فى عونها ويقويها.

احكلكوا بقى عن رحلتى فى يوم اليتيم ..قولنا احنا واصدقاءنا فى الجامعة نطلع على الملجأ وكدة فى اتوبيس وبتاع المهم روحنا ...اول نص ساعة بعد الصلاة كانت جميلة ولطيفة وكل حاجة فجأة سمعت صوت اغانى جامدة اوى جاية من خيمة كانت منصوبة فى الجنينة الكبيرة انا قولت عاملين فيها ملاهى للاطفال ولا حاجة

لما سمعت الاغانى روحت ابص لاقيت .. دى جى ومسرحين كل مسرح عليه بتاع 20 بنت هاتك يا رقص ومسخرة والولاد حوليهم ترقص ..ويا حسرة على اليوم اللى كان الواحد نفسه يعمل فيه عمل خير مع العلم ان عارفة ان يوم اليتيم دة حرام بس انا كنت رايحة بنيه انه يوم عادى مع اللى رايح

المهم لما شوفت المنظر وذهلت اخدت بعضى وروحت ...دة ايه الاخلاق دى ..دى اخرة الايتام اللى متأمن عليه الملجأ دى القيم اللى بيعلمهلهم ؟؟!!

ما علينا ...

حصلى موقف غريب اوى من قيمة اسبوعين ..كنت قاعدة مع اصحابى فى الجامعة مستنيين محاضرة ..قاعدين على رصيف فى الجامعة قعد جمبنا شلة ولاد ..المهم احنا كنا بنذاكر قعدوا يلقحوا علينا كلام احنا عملنا زى الهبل مش سامعين

بعدها جه علينا اتنين من بنات اصحابنا بردة ...(كنت فكراهم غير كدة) المهم قعدوا يقوللهم حاجات مقدرش اقولها والله وفتحوا معاهم حوارات وقالولهم كلمة هيا اصلها اسكندرانى اكيد عرفتوها وانا قاعدة مبرقة ومذهولة من اللى بيحصل حوليا ..واقول لاصحابى البنات هيا كذا ازاى عملت كدة قالولى اصل باباها خانقها فى البيت وهيا اصلا كدة ...!!!

يا سلام على الاخلاق والمبررات الجميلة ..

اة اخر موقف هحكيهلكوا ((كفاية عليكوا كدة عشان بس متتعبوش)) قاعدة مروحة فى الاتوبيس جمب السواق قدام انا واحدة المهم الواحدة دى كانت حاطة ميك اب والله ولا كأنه الوان رسم على لوحة المهم على كمية المحلسة وقلة الادب من الكمسرى والسواق ليها وانا قاعدة باكل شيبسى وكدة وكأنى قاعدة فى سينما وبتفرج ..لا والاكتر من كدة السواق وقف حبة فى الاتوبيس قدام ورشة تصليح يقوم الراجل يدخل ايده من الشباك ويقولها تاخدة سيجارة ..تقوم تقوله ماشى هات والله انا كنت خايفة اتشبه لمجرد ان انا قاعدة جمبها ...واخر موقف الاخت عملته الكمسرى نزل معاها فى الحتة اللى هيا نزلاها (اصلها نزلت قبلى ) نزل معاها وقالها هاتى اشيلك الكتب ونزلوا ..

كفاية ..كفاية عليكوا كدة انا اصلى كنت مفروسة وقولت افضفض شوية قبل الامتحانات بدل ما اطق اموت

يلا سلامى للكل ...((هغطس سنة كمان وبعدين اقب ))

وحشتينى يا سمسمة انتى وبوكا والناس كلها