بسم الله الرحمن الرحيم
انا امبارح صحيت من النوم وبقول ل امى ان ا عايز افطر قالتلى مفيش عيش والمهم قولتلها ما جبتيش ليه قالتلى الرجال الى بيجبلنا مش بقى بييجى انزل هات من الفرن
طبع ناا بقالى كتير مش بروح افران ولا كده ومش عارف ايه الى فيها
المهم نزلت ورحت الفرن ابص من قبلها ب حولى 20 متر ناس وقفه انا ما اخدتش ف بالى وفاكر ان ده مش تبع الفرن وكده روحت اشوف الشباك الى انا عايز اشترى منه لقيت الناس الى ها تشترى من الفرن العيش كتير قوى
المهم قولت لازم اقف واشترى زى زى الناس دى انا مش احسن منهم وبعدين مش ها كررها تانى
المهم وقفت ف الفرن لاقيت حجات بصراحه مش عارف اقولها ازاى
بييجى الافران بتوع محلات الكباب ويخدو اغلب العيش والناس وقفه ومره ليهم ومره للناس الى ب تيجى تشترى وانا واقف لاحظت حاجه مش قادر افهمنا
هو الدقيق لما بيخش الفرن المدعم يعنى
بيخرج تانى ليه وناس تخده ف عربيات
المهم انا قولت ما ليش دعوه ب الكلام ده وقولت اكلم
المهم انا كونت ف الفرن الساعه 1 الظهر ومكتوب عليها هى بتخلص الساعه 5 المغرب
اعدت واقف لحد ما الحمد لله ربنا كرمنى وبقيت تانى واحد المهم لاقتهم ققفلو الشباك وانا خلاص قدام فا طبعا اضايقت روحت اساله ف ايه قالى احنا شطبنا
قولتله ازاى قالى الدقيق الى عندنا خلص اعدت اتكلم معاه شويه وف الاخر راح الراجل فاقل الشباك ف وشى زى ما اكون شغال عنده
و بيتامرو على الناس بصراحه بطريقه وحشه انا عايز افهم حاجه
هو الناس دى بتعاملنا كده ليه
شريف
التعليقات
شكرا يا اخ
شكرا يا اخ بوناسيراعلى الموضوع بس فيه ملاحظات حبيت انبهك لها:
اولا ايه لازمتها عوجة اللسان و تحوير لهجتنا العامية لارضاء الخليجيين .. بتقول ( مش بقى ) و (مش ييجى ) زى الخواجات .. بينما الصح هو (مبقاش ) و ( مابييجيش) و ( ما جاش ) و ( ما راحش ) هى لهجتنا كده .. و لو هما عايزين يفهموا لهجتنا ما يتعلموها مش احنا اللى نغير لهجتنا عشان تبقى زى ( مو )
ثانيا : ليس بالخبز وحده يحيا الانسان .. و انتو مفيش ف دماغكم الا الخبز .. خوتونا بالموضوع المفتعل .. و خوتتنا الجرايد و البرنامج .. عيش عيش عيش .. لما يبقى كل كلامنا و تفكيرنا ف العيش يبقى عايزنا نتقدم ازاى .. سبنا ايه للجعانين ؟؟؟ .. و ما دام مش عارف تجيب العيش ابو شلن جيب ابو ربع جنيه .. يعنى هى خلاص الحكاية دى هى اللى هتبوظ الميزانية و لا عايزين ناكل ببلاش ... هوه فيه سلعة الا ما غليت و لا هتاكلوه حاف ؟! .. اشمعنى ده اللى محموقين عشانه .. و يبقى كداب اللى يقول لك العيش ينفع من غير غموس .. لو كاله حاف مش هيشبع .. هوه فيه حاجة دلوقتى لسه تمنها شلن ؟؟؟ ده حتى اللبان و لا البونبون اغلى من كده يبقى محموقين ليه .. ده حتى من باب تكافؤ الفرص يا اخى... بدل الخوتة ف العيش و سنينه .. و السياسة و سنينها اعرضوا معلومة مفيدة .. او حتى نكتة و لا فكاهة يا اخى .. دا الشكوى لغير الله مذلة .. و انا مبشوفش مصريين على ام ده نت الا و بيشتكوا .. طب ما تحاولوا مرة تكونوا متفائلين يا اخى حتى متشمتوش الوهابيين و المتطرفين فينا .. و تفاءلوا شوية دانتو مصورين مصر على انها شوية جعانين و خلاص .. دا حاجة تفلق
فكر فى كلامى من غير تعصب لرايك و راى الاغلبية و انت هتلاقى فيه وجاهة
سلام
وجاهة أيه يأخ
وجاهة أيه يأخ أدانسيه.. إنتا مش شايف إن في مشكله خالص ... وأيه حكاية الموضوع المفتعل ده إن شاء الله.. يعني مفيش أساسا أزمة عيش..!.. إنتا اللي يسمعك كده يفتكر إن إحنا بنتجنا على الحكومه ومفيش ناس ماتت عشان العيش ومفيش خناقات في الأقسام كل يوم والحياه وردي خااالص ...وبعدين بتقول بكل بساطه لو ملقتش أبو شلن جيب أبو ربع جنيه..!.. بسيطه يعني.. ولما حضرتك الناس تجيب رغيف أبو ربع جنيه عامل زي القرص.. يبقى هيضطروا يجيبوا نفس العدد اللي هيجبوا من أبو شلن.. وساعتها هيصرفوا بخمسه جنيه عيش كل يوم..يعني من الإخر هيقضوها عيش الشهر كله ولو فضل حاجه من المرتب يدوبك هيجيبوا بيها شويه ملح..!.. وبعدين تقدم أيه اللي بتتكلم عنه.. التقدم ده محتاج إبداع والإبداع بيجي لما ناس تبقى مستقره وعايشه كويس وذهنها صافي ومستريحه نفسيا..لكن الناس مش لاقيه تاكل عيش ويدوبك بينام ويقوم كل تفكيره إنه يجيب العيش ويحاول يظبط الميزانيه عشان يعرف يأكل عياله بقييت الشهر.. يبقى هييجي منين الإبداع يعني ..!.. وأيه المعلومات المفيده اللي عايز تعرفها دي.. وهو في أفيد من كده كلام.. ده إحنا بنتكلم عن مشاكلنا وبنتناقش لحلول فيها في المدونه .. لو إنتا عايز نكت فرفشه يبقى روح دور عليها وهتلاقي مواقع كتير متخصصه في ده..لكن المدونات دي وخصوصا المدونه دي بتبقى مدونات يغلب عليها الطابع السياسي.. ولو إنتا مش عايز وجع القلب .. سبها وريح دماغك يا عم.. مش كده برضه ولا أيه
أنا المصري... بفنه ولونه وسكوته.... وأنا اللي اديت للحجر صوته.... وناولت للامل صيته ...وفاكر في الضحى صلاة عصري.... أنا المصري
الاخ اللى اسمه
الاخ اللى اسمه أومار ده عامل زى الغشيم و متعافى .. و مش عارف يكتب اسمى اساسا ، معلش انا كمان معرفتش اكتب اسمه ، و ايه ان شاء الله دى احنا هنردح يا اخ و لا ايه .. و انت اش حشرك اساسا ، انت مفروض تعلق ع الموضوع و بس ، صاحب الموضوع هوه اللى يرد على تعليقى لو عايز او ميردش هوه حر و عمل اللى عليه و قال رأيه و ده حقه .. و انا برضه عملت اللى عليا و قلت رايى و ده برضه حقى .. و اللى يموت يموت يا اخ و لا هتكفر .. محدش بيموت ناقص عمر .. و كل واحد له اجل لا بيتقدم عنه ساعة و لا بيتأخر .. و من الاساس مسألتش نفسك بدل التنطيط .. ليه كل اللى بيروحوا للفرن معاه مطاوى يا اخ يا متعلم يا نبيه .. اقول لك انا ليه لانهم بلطجية و مسجلين خطر .. بيموتوا بعض عشان العيش و ماله ؟ يبقوا يقولوا كده لربنا بقى ، عشان يبقى يدخلهم الجنة و يقولهم و ماله اقتلوا بعض كمان و انا ادخلكم الجنة .. فى شرع مين ده يا اخ . كل واحد فيهم كان ناوى للتانى ع الشر واحد فشل و التانى نجح .. القاتل و القتيل فى النار ،ما سمعتش ده!
بتقول :ولما حضرتك الناس تجيب رغيف أبو ربع جنيه عامل زي القرص.. يبقى هيضطروا يجيبوا نفس العدد اللي هيجبوا من أبو شلن.. وساعتها هيصرفوا بخمسه جنيه عيش كل يوم..يعني من الإخر هيقضوها عيش الشهر كله ولو فضل حاجه من المرتب يدوبك هيجيبوا بيها شويه ملح..!..
و باقول لك : ميجيبوا .. اللى ياكل على ضرسه يا اخ ينفع نفسه .. و انت اصلا اش عرفك باللى مش لاقيين عيش ، اذا كنت من اللى قاعدين طول النهار قدام الكمبيوتر يعنى هوه رخيص و لا ببلاش ؟؟؟؟ . و ليه بقى ان شاء الله هيقضوها بملح .. شحاتين ؟؟ .. يا اخ بلاش المبالغات اللى لا تودى و لا تجيب .. ما نا قلت لك حتى البونبون مبقاش بشلن .. بتدافع عن الشلن ليه .. امال مين الناس اللى نازلة على الخضار و على الاسواق يا اخ .. مخلوقات فضائية و لا سياح ؟؟
بتقول : وبعدين تقدم أيه اللي بتتكلم عنه.. التقدم ده محتاج إبداع والإبداع بيجي لما ناس تبقى مستقره وعايشه كويس وذهنها صافي ومستريحه نفسيا
و باقول لك : حتى لو ادوا لكل واحد منهم سبيكة دهب برضه مش هيصفا ذهنهم التخين ، و لا هيبطلوا يكرهوا بعض و يحقدوا على بعض ، لو بقوا مليونيرات برضه مش هيتقدموا و لا يبدعوا يا اخ لان الابداع عايز مخ نضيف ، و العيش مش تخصصه تنضيف المخ الزنخ .. انت الظاهر من بتوع نظرية أعطنى جنيها أعطيك ابداعا ، متعرفش ان الاوربيين بدأوا من الصفر .. استفادوا بعلوم العرب و تفوقوا عليهم دلوقتى و التلميذ سبق استاذه الكسول اللى مشى خطوتين و ركن فى الخط فى نصف الطريق.. دلوقتى ما شاء الله التلميذ فييين و الاستاذ فييييييييييييييين ! لا التلميذ فضل تلميذ و لا الاستاذ فضل استاذ سبحان مغير الاحوال
وأيه المعلومات المفيده اللي عايز تعرفها دي.. وهو في أفيد من كده كلام.
أفيد من وجهة نظرك انت ، مش من وجهة نظرى ، بتسمى الشكاية اللى زى شكاية النسوان لا مؤاخذة يعنى فى الكلمة بس هى كده ، الشكاية دى مفيدة ، متعرفش ان جزاء الصبر عظيم ، و ان الشكاوى دى مضيعة لثواب الصبر ، و ان الشكوى لغير الله مذلة ، و عايزنا نعمل لك ايه يعنى ، بدل ما ترفهوا عن الناس و تدوهم امل و تفاؤل عمالين تضلموها و تسددوها فى وشوشهم ، الناس عارفة ده كله ، و بعدين ؟؟؟ .. و لك عين كمان تجادل فى المعلومات و الثقافة .. فين الفايدة دى من شكاوى الولايا يا اخ .. متروح تقرالك كتاب و لا تلخص بحث علمى و تنشره تفيد بيه الناس الغلابة دى بدل الجدل و النظرة السوداوية الكئيبة اللى عايز تخلليها شعار المدونة
لو إنتا عايز نكت فرفشه يبقى روح دور عليها وهتلاقي مواقع كتير متخصصه في ده..لكن المدونات دي وخصوصا المدونه دي بتبقى مدونات يغلب عليها الطابع السياسي.. ولو إنتا مش عايز وجع القلب .. سبها وريح دماغك يا عم.. مش كده برضه ولا أيه
يعنى بتطردنى بس بصنعة لطافة ، و انا يا سيدى مش ماشى ، و أنا حر فى رأيى ، معرفش الصراحة إيه اللى حمقك اوى كده .. يا سيدى مدام رأيى مش جاى لك ع المرام ، غمض عينيك لما تشوفه ... يا اخى بدل تنشيفة الدماغ دى فكر فى كلامى من غير تحيز .. انما العند يولد الكفر صحيح
أنا مش عارف..
أنا مش عارف.. هو ده أسلوب واحد في الكلام أو في الرد.. ده أسلوب واحد المفروض إنه متعلم أو مثقف..!!
"الاخ اللى اسمه أومار ده عامل زى الغشيم و متعافى .. و مش عارف يكتب اسمى".. يعني في حد محترم يقول كده..وبعدين هو ده إسم أصلا عشان يتكتب أو ميتكتبش.. وعلى الأقل إسمي ليه معنى ويتفهم من غير حاجه.. وتفتكر إن إسمك كان جوهر الموضوع...! غريبه
و انت اش حشرك اساسا ، انت مفروض تعلق ع الموضوع و بس
ومين فهم حضرتك إن المفروض سواء أنا أو غيري لازم نعلق على الموضوع بس..أنا أو غيري نقدر نعلق على الموضوع أو التعليق عشان نتناقش في الأراء سواء عجبني أو معجبنيش ونفس الشئ لكل أعضاء المدونه.. وده حقك في نفس الوقت إن إنتا تعلق على أي شئ عايز ترد عليه وتقول وجهة نظرك.. ويا ريت متحجرش على حد عشان دي مش ديمقراطيه
و اللى يموت يموت يا اخ و لا هتكفر .. محدش بيموت ناقص عمر .. و كل واحد له اجل لا بيتقدم عنه ساعة و لا بيتأخر .. و من الاساس مسألتش نفسك بدل التنطيط .. ليه كل اللى بيروحوا للفرن معاه مطاوى يا اخ يا متعلم يا نبيه .. اقول لك انا ليه لانهم بلطجية و مسجلين خطر .. بيموتوا بعض عشان العيش
غريب جدا الامبالاه اللي بتتكلم بيها دي.. يعني نسيب الناس تموت مش مشكله..ومحدش بيموت ناقص عمر.. وبعدين حاولت تكفرني.. وكإنه من الواجب علينا أن نترك الشعب يموت والناس تموت.. مش مشكله فعلا.. لإن سيادتك قاعد في برج عاجي فمش فارق معاك حاجه.. هو إنتا جربت مره في حياتك تنزل الفرن وتسأل الناس عن حالها.. أو من غير متسألهم .. حتى تشوف حالهم ووشوشهم البائسه بشكل مفجع.. أكيد لو جربت في مره واحده تنزل.. عمرك ما كنت قلت الكلام ده.. وبعدين وصفت اللي بيروحوا الأفران بالبلطجيه..!.. يعني الشعب المصري تلات ترباعه على الأقل بلطجيه.. يعني حضرتك بتهين الشعب المصري تقريبا.. وبتتكلم على الناس اللي معاها مطاوي وهم قله قليله.. متشوف اصحاب الأفران بيعملوا أيه أساسا ... وليه متقولش إن الناس اللي جابت مطاوي ديه حاسه إن هي بقت في غابه.. البقاء فيها للأقوى.. رغم رفضي الشديد لهذا الأسلوب بس ممكن يكون تفسير منطقي وليس تبرير..
و باقول لك : ميجيبوا .. اللى ياكل على ضرسه يا اخ ينفع نفسه .. و انت اصلا اش عرفك باللى مش لاقيين عيش ، اذا كنت من اللى قاعدين طول النهار قدام الكمبيوتر يعنى هوه رخيص و لا ببلاش ؟؟؟؟ . و ليه بقى ان شاء الله هيقضوها بملح .. شحاتين ؟؟ .. يا اخ بلاش المبالغات اللى لا تودى و لا تجيب .. ما نا قلت لك حتى البونبون مبقاش بشلن .. بتدافع عن الشلن ليه .. امال مين الناس اللى نازلة على الخضار و على الاسواق يا اخ .. مخلوقات فضائية و لا سياح ؟؟
وللمره التانيه بتغلط في المصريين وبتصفهم بالمخ التخين والزنخ..على أساس إن إنتا مش منهم.. وبعدين أنا مش من إللي بيعدوا طول النهار قدام لكمبيوتر زي حضرتك..وأنا أعرف الناس إللي مش لاقيين العيش لإني تقريبا يعتبر منهم .. لكن إنتا إللي معندكش فكره عنهم والدليل كلامك.. وبعدين بتتكلم عن الأوربيين اإللي بداوا من الصفر..!.. ومين قال لسيادتك إنهم بدأوا من الصفر.. أساس تقدم الاوربيين العلوم العربيه التي نقلت لهم في عصور الظلام.. يعني مبدأوش من الصفر ولا حاجه هم أكملوا ما بدأوه العرب..وبعدين لما أكملوا إللي إحنا كعرب عملناه في قديم الزمان.ز بدأو في ظروف أداميه وكانوا بياكلوا ويشربوا ومستريحين وإللي بيعمل حاجه هناك بيتقدر ويحترم .. وهنا العكس تماما..وبعدين أيه حكايه البونبون والشيكولاته معاك..البونبن والشيكولاته دي حاجات مش أساسيه ولا مهمه لكن إحنا بنتكلم في حاجه أساسيه زي العيش وغيره من المنتجات الأساسيه.. إزاي بتقارنهم ببعض.. إنتا ممكن متشتريش بونبون ولكن مينفعش متشتريش عيش
أفيد من وجهة نظرك انت ، مش من وجهة نظرى ، بتسمى الشكاية اللى زى شكاية النسوان لا مؤاخذة يعنى فى الكلمة بس هى كده ، الشكاية دى مفيدة ، متعرفش ان جزاء الصبر عظيم ، و ان الشكاوى دى مضيعة لثواب الصبر ، و ان الشكوى لغير الله مذلة ، و عايزنا نعمل لك ايه يعنى ، بدل ما ترفهوا عن الناس و تدوهم امل و تفاؤل عمالين تضلموها و تسددوها فى وشوشهم ، الناس عارفة ده كله ، و بعدين ؟؟؟ .. و لك عين كمان تجادل فى المعلومات و الثقافة .. فين الفايدة دى من شكاوى الولايا يا اخ .. متروح تقرالك كتاب و لا تلخص بحث علمى و تنشره تفيد بيه الناس الغلابة دى بدل الجدل و النظرة السوداوية الكئيبة اللى عايز تخلليها شعار المدونة
للمره التالته بتغلط بكلمات وأوصاف بذيئه وواضح إن ده إسلوبك.. وعايزنا نفضل على حالنا ومنغيرش من نفسنا.. يبقى إنتا إللي مش عايز تقدم.. عايزني أضحك على الناس واديلهم تفاؤل بأشياء مش موجوده..ما أنا أقدر أديلهم تفاؤل وأنا بديلهم الحلول للأزمه والناس هتصدق ده أكتر عشان هتحس إن ده منطقي أكتر.. ومش هتصدق الضحك على الدقون..وكلمه أخيره لو إنتا راجل غني مستريح وقاعد في برجك العاجي وشايف الدنيا وردي.. تذكر إن هناك من هو فقير ومطحون وغايص في الطين الذي لا تراه أنت من برجك العاجي
أنا المصري... بفنه ولونه وسكوته.... وأنا اللي اديت للحجر صوته.... وناولت للامل صيته ...وفاكر في الضحى صلاة عصري.... أنا المصري
حلوة اللعبة دى
حلوة اللعبة دى يا اخ .. هنقعد قصاد بعض بقى نلت و نعجن .. و ماله ؟ مفيش مانع ما دام دى رغبتك
يعني في حد محترم يقول كده .. وبعدين هو ده إسم أصلا عشان يتكتب أو ميتكتبش.وعلى الأقل إسمي ليه معنى ويتفهم من غير حاجه.
مين اللى بيغلط يا اخ انا و لا انت .. و انت مالك باسمى اساسا هتعلمنى كمان اكتب اسمى على مزاج سيادتك عشان تعرف تقراه كويس . و انت شأنك ايه اسمى يتفهم و لا ميتفهمش و لا انت بتلطش و خلاص. انا حر ان شاء الله اكتب اسمى هيروغليفى . و انا محترم و مش امثالك اللى يخللونى افقد ثقتى فى نفسى .. انما انت ماشى بالمثل ( كلم ... تلهيك و اللى فيها تجيبه فيك ) .. اول اصول الحوار اللى المفروض انك تتعلمها انك تكتب اسم خصمك فى الجدال صح مش تتعمد تلخبط فى اسمه تحقيرا ( أدانسيه!!!) و لو مش عارف تقراه بلاش تكتبه خالص بدل ما تفتى و تلبخ فيه
وكإنه من الواجب علينا أن نترك الشعب يموت والناس تموت
خللى بالك انك بتفهم الكلام على مزاجك و بتلوى ذراع الكلام ، و بتفسره بطريقة كأنى بأقول لك موت الناس ، يا ريت بلاش تشوه كلام خصمك فى الجدال عشان تثبت صحة وجهة نظرك
لإن سيادتك قاعد في برج عاجي فمش فارق معاك حاجه.هو إنتا جربت مره في حياتك تنزل الفرن وتسأل الناس عن حالها
ما زلت مصر ان انا اللى باغلط فيك مش انت . كل ده عشان عينك شافت كلام جديد عليك و راى جديد مش على هوى عقليتك الكريمة
وبعدين وصفت اللي بيروحوا الأفران بالبلطجيهيعني الشعب المصري تلات ترباعه على الأقل بلطجيه.. يعني حضرتك بتهين الشعب المصري تقريبا..
محاولة اخرى للمراوغة ، الناس اللى ماتوا دول مش ماتوا بمطاوى و لا ماتوا لله فى لله ؟ و مين اللى شايل المطاوى يا اخ يا محترم يا ابو لسان زى السكر
محاولات لتعميم حكمى اللى انا وضحته بما فيه الكفاية بس سيادتك واخد الظاهر على تزوير الكلام و قلب الحقايق و الهروب من حقيقة القتلة اللى قتلوا الناس فى الافران . و محاولة رخيصة لتحويل كلامى زورا ضد الشعب المصرى
وليه متقولش إن الناس اللي جابت مطاوي ديه حاسه إن هي بقت في غابه
تبرير مرفوض و تفسير على الهوى لجريمة قتل النفس التى حرمها الله و عدها من كبرى الكبائر
وللمره التانيه بتغلط في المصريين وبتصفهم بالمخ التخين والزنخ.
مين اللى بيجيب سيرة المصريين ككل يا اخ يا نبيه يا ابو النباهة كلها .. انا و لا انت ... و لا الشعب كله اذكيا ما كل شعوب العالم فيهم الذكى و فيهم ابو مخ تخين و زنخ .. ايه المشكلة يعنى .. و لا الشعب المصرى معصوم !!
لكن إنتا إللي معندكش فكره عنهم والدليل كلامك.
وبعدين بتتكلم عن الأوربيين اإللي بداوا من الصفر..!.. ومين قال لسيادتك إنهم بدأوا من الصفر.. أساس تقدم الاوربيين العلوم العربيه التي نقلت لهم في عصور الظلام.. يعني مبدأوش من الصفر ولا حاجه هم أكملوا ما بدأوه العرب
يا ريت ترجع تقرا كلامى تانى
و لا على ايه اجيبهولك هنا عشان تشوف قرايتك غير المتأنية بتعمل ايه:
متعرفش ان الاوربيين بدأوا من الصفر .. استفادوا بعلوم العرب و تفوقوا عليهم دلوقتى و التلميذ سبق استاذه الكسول اللى مشى خطوتين و ركن فى الخط فى نصف الطريق.. دلوقتى ما شاء الله التلميذ فييين و الاستاذ فييييييييييييييين ! لا التلميذ فضل تلميذ و لا الاستاذ فضل استاذ سبحان مغير الاحوال
معانى المفردات للاخ ابو مخ مش تخين:
العرب هم الاستاذ و الاوربيين هم التلميذ
البونبن والشيكولاته دي حاجات مش أساسيه ولا مهمه لكن إحنا بنتكلم في حاجه أساسيه زي العيش
متزعلش نفسك بلاش البونبون .. الخضار و الفاكهة و الزيت و الدقيق .. ارتحت ..
العيش وغيره من المنتجات الأساسيه
الاخ متكلمش الا عن العيش و مغامراته مع الفرن و كان الاولى بيه يشتكى فى وزارة التموين و لا حتى ما دام انت و هوه من الشجعان المغاوير تفتحوا بطن الفران بالمطواة ، مش انت بتدافع عن شيل المطواة يا !
للمره التالته بتغلط بكلمات وأوصاف بذيئه وواضح إن ده إسلوبك.
الاخ مش عاجبه صراحتى .. هى كلمة الحق وجعتك اوى كده يا اخ .. و عمال تلف و تدور و ماسك فى كلمة النسوان البذيئة يااااااااااااى .. يبقى مين اللى من مصر الجديدة و مين اللى فافى و فرفور و بيشمئز من النسوان و الولايا .. و مين اللى يشتكى غير الولايا ؟؟؟؟؟؟؟؟؟؟؟ الراجل ميشتكيش .. معلموكش كده ف المدرسة ؟؟؟
وعايزنا نفضل على حالنا ومنغيرش من نفسنا
و هوه شوية الشكاوى اللى ف مدونة محدش يعرفها و لا يسمع عنها هى اللى تغيركم و تصلح حالكم .. ما الجرايد كل يوم بتكتب و تدش ، و التلفزيون شغال فى تحقيقات عن العيش .. يعنى انتو عملتوا المعجزات ؟؟؟ و هوه الفران الموالس مع المطاعم هيقرا النت ؟؟؟ ! .. و لا السادة المسئولين هيفتحوا مدونتك الكريمة مخصوص .. لا و هيترعشوا يا عينى .. تصدق فعلا ممكن
يبقى إنتا إللي مش عايز تقدم
تقدم ايه اللى انا مش عايز .. تقدم على طريقة مسابقة افضل موضوع عن الخبز و سنينه و ايامه و شهوره .. طب ما تبطلوا السجاير اللى بتدفعوا فيها دم قلبكم و انتو تلاقوا فلوس فى ايدكم للعيش .. و ما تبطلوا كروت الموبايلات و انتو ينصلح حالكم و تلاقوا فلوس توفروها للعيش
عايزني أضحك على الناس واديلهم تفاؤل بأشياء مش موجوده
ليه مش موجودة .. اتكلم عن نص الكوب المليان مش الفاضى .. و لا انت من المتشائمين اللى شايفين كل الكوباية فاضية
مسمعتش الحكمة اللى بتقول : جبر الخواطر على الله
اجبر بخاطر الناس مش تشيلهم هموم على همومهم .. الناس عارفة كل الكلام ده و بيقفوا فى الطوابير و شايفين اللى بيحصل فيها .. يعنى انت اخترعت اختراع جديد يعنى
ما أنا أقدر أديلهم تفاؤل وأنا بديلهم الحلول للأزمه والناس هتصدق ده أكتر عشان هتحس إن ده منطقي أكتر..
هى فين الحلول دى ؟؟؟؟ مفيش اى حلول .. المقال ده و غيره بيعرض للمشكلة من غير حلول .. انتو فالحين بس فى الشكاوى انما ساعة الحل هتلوصوا .. و انتو ايه فى ايدكم اساسا عشان تحلوا المشكلة ... شوية الشكاوى دى هى اللى هتحلها ..
وكلمه أخيره لو إنتا راجل غني مستريح وقاعد في برجك العاجي وشايف الدنيا وردي
يابنى يا حبيبى مش كل اللى ينصحك انك توسع دماغك عشان تساع امور تانية اخطر و اهم من بطنك ، يبقى غنى و مستريح ، شغل مخك فى حاجة اهم من معاندة العيال دى
تذكر إن هناك من هو فقير ومطحون وغايص في الطين الذي لا تراه أنت من برجك العاجي
و الله انت اللى حاطط عصابة على عينيك و قافل مخك عن الاراء المخالفة لرأيك ، و على فكرة حكاية البرج العاجى دى شرف و فخر لا ادعيه لان معناها الزهد و التصوف عن الدهماء و اخلاقهم التى كانت واضحة من ازدرائك لسكان الابراج العاجية اللى هما المفكرين و الفلاسفة و العلماء .. مش الاغنيا و المستريحين زى ما بتقول
و فى النهاية : هداك الله و هدانا معاك .. بس يا ريت يكون ده اخر نقاش لينا ف الموضوع ده .. و يا ريت تحتفظ برايى لنفسك و متردش عليه لان الموضوع خلاص خرج عن حدوده و استوفى حقه و زيادة .. و الله رضيت كان بها .. مرضيتشى خللينا بقى فى كلام و جدال كده و نضيع وقتنا و نتناقر زى الديوك
سلام
فعلا ده هيكون
فعلا ده هيكون أخر رد ليا عليك.. أنا غلط فعلا في الرد على واحد عمال يزور في الكلام وياخد نصف الكلام من غير ما يكملوه ويعلق عليه ويفهم اللي بيقرا إن أنا قصدي كده..وبيعمل بالظبط زي إللي بيقولوا "لا تقربوا الصلاه".. أنا غلط فعلا إن أنا رديت عليك..وإنتا أساسا شكلك من اللي كانوا بيدخلو المدونه عشان يبوظوها زي فلتاقوس المطرود ورمسيس والناس دي إللي كانت عايزه تبوظ علينا المدونه.. ولكن بقولهالك .. مش هتقدر إنتا ولا عشرين زيك إن إنتا تخليني مكتبش عن الحاجات المهمه..
وأنا بعتذر لبقيه الأعضاء المحترمين على إني دخلت في مهاترات مع من لا يستحق.. وبأعد أعضاء المدونه إن أنا لن أدخل في مهاترات من هذا النوع البذئ والقذر
تحياتي للأعضاء المحترمين فقط
أنا المصري... بفنه ولونه وسكوته.... وأنا اللي اديت للحجر صوته.... وناولت للامل صيته ...وفاكر في الضحى صلاة عصري.... أنا المصري
بسم الله الرحمن
بسم الله الرحمن الرحيم
انا عايز اقولك حاجه يا م باشا
الكلام الى انت ب تقول عليه ده
كلام عادى جداا وكل الناس الى ف الشارع ب يتكلمو كده ده لو انت مش ب تمشى ف الشارع يعنى
وعلى العموم كل واحد حر ف طريقه الكلام
وتانى حاجه
انا عايز اقولك حاجه انت بتقول العيش مش مشكله .....
طيب ها قولك على حاجه
لو اسره متعوده تاكل كل يوم 30 رغيف
لانهم اسره كبيره
يعنى 6 اولاد والاب والام
ها يجيب ال 30 دول على رايك من ابو 25 قرش
اوك
يعنى كل يوم ها يشترو عيش ب 7.5 جنيه
بالذمه هو ها يشترى عيش بس ب 7.5
طيب ها يجيب باقى الاكل ازاى والمصاريف والمدارس والعيشه
فكر شويه كده ها تلاقى ان المشكله كبيره قووووووووووووووى
ولازم ليها حل
وشكرااا
شكرا يا اخ
شكرا يا اخ بوناسيرا على ردك المهذب و العقلانى ، و ربما يكون رايك له وجاهته ايضا .. و اسف ان كان كلامى ضايقك عن غير قصد منى انما كنت باتكلم بشكل عام
تحياتى و احترامى البالغ