مساء الفل علي الكل انا مشتركه جديده عندي شويه حاجات واجعه دماغي اما الحق اقولها قبل ما تنفجر اول حاجه عن الضجه الكبيره اللي حصلت لما عصام الحضري سافر سافر هه مش هرب زي البعض ما بيقول ايه المشكله يعني لما يسافر عشان يحترف اظن يعني محدش هيكون بيخاف علي مصلحته اكتر من نفسه وبعدين قبل ما اي حد يفتي يرد علي السوال ده لو جالك عقد في مكان تاني غير اللي انت فيه بضعف المرتب هتروح والا؟ يا ريت
نجاوب بصراحه وبلاش نفسنه علي الراجل ... تاني حاجه وجعالي دماغي الست اللي تم اختيارها انها تكون اول مازونه في مصر وعلي مستوي العالم العربي لو حد منكم شاف الحوار بتاعها امبارح علي المحور وشاف الحقد اللي في عيون المازونين الرجاله وازاي هما بيعارضوها زي ما تكون الست ارتكبت جريمه انا مش عارفه ايه السواد ده ودلوقتي بقي بعد ما قلتلكم علي اللي واجعلي دماغي اروح اتخمد بقي عشان عندي صداع
التعليقات
يا حبيبتي انا
يا حبيبتي انا كان قصدي خير والله وزي ما فهمت من مقالك عن عمل المراه انه بقي شي مهم وضروري يعني ما اختلفناش بس انا مش فاهمه انت ليه معتبره ان الست ديه تافهه وبعدين استني هنا احنا هنخلي الحاجات دي تزعلنا من بعض لا ده كله الا انت يا سومه
لا طبعا يا بنتى
لا طبعا يا بنتى ولا زعل ولا بتاع انا بحب اتناقش وانفعل فى النقاشات هههههههههه
كدا يعنى هههههههه وانت كمان انفعلى وننفعل ونحدف بعض بالطماطم وبعدين نقعد نضحك انت مبتعرفيش تلعبى ولا ايه طيب اسالى عمك قرصان انا وهو مره شدينا مع بعض وحدفنا بعض طماطم وطوب وقعدنا نضحك بعدها
تحياتى ليكى سومه_87
بصي يا سومه
بصي يا سومه معني كلامك ده ان المراه مالهاش لازمه لما بتقولي قاضيه وقولنا ماشي مع ان المفروض ان ده يكون مصدر فخر ليكي وبعدين كلامك عن ان المراه عاطفيه اكتر من الراجل فده في حياتها الشخصيه اما في شغلها فهي اكيد بتفصل اما عن موافقتك علي تاكسي السيدات وانه مصدر امان فما ادراك ان اللي انت راكبه معاها دي مش هتشممك حاجه مثلا صحيح مش هتغتصبك بس ممكن تسرقك وفي النهايه كل شى له مميزاته وعيوبه وشكرا يا جميله علي متابعتك
اولا مقلتش
اولا مقلتش المراه ملهاش لازمه ....فمتخلينيش اشك فى كلامى يا مورو....
انا قلت منشغلش نفسنا باشياء لا تقدم ولا تاخر.....
لكن اللى بيحصل دا هروب من الحقيقه لان معروف المراه تحكم بعواطفها حياتها و شغلها ولا يمكنها الفصل بينها ولا يمكن اى انسان الفصل بين نفسه الانسان لديه طبيعه واحده لكن لديه شخصيات متعدده....
باله عليكى يا شيخه ست تشتمك ولا راجل يغتصبك ثم انا بتكلم على الطبيعى....مش على شواذ القاعده.....لان برضوا الراجل ممكن يشتم ويضرب ويغتصب ويسرق
انا بتحدث عن ايجابيات الموضوع لان سلبياته اقل ....
وفخر ايه فخر ان المراه بقيت قاضيه ..!!؟؟ وايه الفخر فى كدا ...الظلم اترفع عن المراه فى المجتمع لما اصبحت قاضيه ؟؟؟؟
لسه الاضطهاد هو هو والمجتمع مازال مجتمع ذكورى غير عادل انا افخر بالمراه يوم ما تربى جيل يحارب جيل يقف فى وجه اسرائيل
انتبهى لشىء بقى مهم الست زمان ايام سى السيد على اد ما كانت مظلومه ربت اجيال حاربو ا ووقفوا فى وش اسرائيل اجيال يوم ما العيش كان بيرتفع نكله كانوا بيثوروا
مش اجيال دلوقت اللى سورى بياخدوا على قفلاهم من الحكومه ويقولوا كماااااااااان
ولو عاوزه تعرفى رائيى فى عمل المراه ارجوكى تقراى الموضوع دا
http://blog.mashy.com/node/1222
انا عاوزه نظرتنا تبقى شامله مش سطحيه ومنفرحش باشياء تافهه عملت ايه القاضيه لينا ولا المازونه....انا افخر بالمراه يوم ما تثبت للمجتمع انها نصه
وتربى النصف الاخر... فعلا مش بتطالب بحريه مزيفه بلا حدود ولا قيود.....حجاب لا انا حره ...طيب استرى نفسك الشباب 40 سنه مفيش جواز ....وانت مالك يا سئيل تتعدى على حريتى.....طيب بلاش تضحكى بقله ادب....امشى كويس ....حريه... طب يا ستى بلاش شيشه ...وانت مال اهلك....انا اعمل اللى عاوزاه انا حره
عموما حصل خير شكل الموضوع اخدنا
وانا فرحانه بالنقاش دا فعلا
تحياتى ليكى سومه_87
اولا بشكرك يا
اولا بشكرك يا عمر علي المشاركه ثانيا الاختلاف في الراي لا يفسد للود قضيه اما عن كلامك عن المازونه معناه ان في مهن حريمي ومهن رجالي طب ازاي والمراه بقت وزيره وسفيره ومحاميه وقاضيه وسواقه تاكسي وجزاره وانا ركزت علي دول بالزات لانهم مهن تتطلب التعامل مع رجال بل من الممكن ان يطغي فيهم عدد الرجال عن النساء وبعدين موضوع كتب الكتاب لا يتعدي الربع ساعه وبعدين الست عامله مكتب لمن يريد كتب كتابه دون الحاجه للزهاب للمسجد وحتي وان حدث فبيكون امام الناس يعني انا مش شايفه اي عيب في الموضوع moro بكرر شكري ليك
مورو حبيبتى انا
مورو حبيبتى انا حكلمك بالعقل بلاش الدين....مع انه جزء كبير من حياتنا....ايه اللى يجبر المراه تشتغل مازونه.....خلاص يعنى الدنيا مقفلتش طيب قاضى وقولنا ماشى وسكتنا مع ان المراه متنفعش تكون قاضى علميا معروف ان المراه مشاعرها وعاطفتها تسبق تفكيرها....الا المراه الحديديه هههههههه وبرضوا بيحركها الانتقام يعنى مشاعر برضو....
حكايه الست مازونه دى صعبه شويه بصراحه انا عن نفسى وانا بنت اهو لايمكن اتجوز على يد مازونه .....اصل الدنيا مزنقتش بقى وقفلت ....المفروض يكون ليها قانون يعنى فى حاله عدم وجود المازون خالص ممكن نستعين بمازونه.....وظيفه مش نسائيه وشايله دفتر وماسكه جبه وقفطان ....طيب تعرفى انا بشجع فكره تاكسى السيدات ....وحيحل مشاكل كتيره للطلبه والبنات والسيدات وحيبقى امان لما اركب تاكسى سايقاه بنت زيى زيها اعتقد حتقل حوادث الاغتصاب بتاعه التكسيات ومشاكلها...لكن موضوع مازونه دا تافه يعنى ملوش اضرار ملوش فوايد ....
انا اعرف ان الحاجه ولا بتفيد ولا بتضر ملهاش لازمه نوجع راسنا بيها....
وفى النهايه اختلفنا عادى اتفقنا عادى ولا انتى شايفه ايه ههههههه
تحياتى ليكى سومه_87
انا متفق
انا متفق معاكي يا مورو إن موضوع الحضري دة تافهة جدا وأخذ أكبر من حجمه بمراحل وفي حاجات كتير المفروض يهتموا بيها أكتر ...ولكني مختلف معاكي في موضوع المأذونة دة...أنا معاكي أن إي حاجة غريبة لازم تقابل بالرفض في البداية ولكن موضوع المأذونة دة موضوع غريب وعجيب أوي...يعني الشغلانة دي بتبقى شغلانة رجالة لأن مينفعش ست تفضل قاعدة وسط رجالة وبعدين أنا سمعت شيوخ موثوق فيهم قالوا ان دة موضوع مينفعش درءا للمفاسد يعني..ودعينا نتفق أن في شيوخ من اللي بالي بالك يعني ..يعني بتوع الحكومة واللي باعو دينهم بدنياهم..وجهة نظري الشخصية ان الموضوع دة مفتعل بشكل مبالغ فيه سواء من الست نفسها أو من الإعلام..وأرجو ان تتقبل إختلافي
تحياتي ليكي
أنا أفكر إذا أنا موجود ....!
شكرا لكى
شكرا لكى مورااااا
وعايز اقولك انه لولا أبو الهول حجر كان زمانه هرب وطفش من البلد على رأى الرسام أشرف حمدى
بلدنا محتاجة معجزة من عند ربنا علشان ينصلح حالها اللهم ارحمنا وانجدنا
ههههههههه حلوه
ههههههههه حلوه ابو الهول حجر على فكره اشرف حمدى دا دماغ....
المهم مورا موضوعك فعلا صح انا مش معارضه سفر الحضرى وخصوصا ان النادى الاهلى قطعه من مصر فيه نفس الظلم اللى بيحصل فى كل مكان واحنا للاسف مبنشوفش غير القشور حنقول اللعيبه بتاخد ملايين طب ما هى بتجيب بلايين ..!!؟؟
تمام زى ما قال عمنا جاهين ...اخلع غماك يا طور وبطل لف اكسر تروس الساقية واشتم وتف قال بس خطوة كمان وخطوة كمان يا تبوظ الساقية يا البير يجف وعجبى..!!!؟؟
زعلانين ليه ان واحد من الثيران رفض وخلع غماه ولا احنا عاوزين نفضل مربوطين كدا على طول..!!؟؟ بعدين دا بيبقى بدقن ويبيع دينه عشان عشره جنيه فى مصلحه حكوميه ...رشوه يسلك بيها اموره او يحطها فى جيبه....ولا اللى يبيع دينه صح واللى يبيع بلده غلط....برايى كلاهما يجيبوا نفس الاعراض ....وكلاهما خيانه للدين والوطن
كمان اصلا محدش عنده وطنيه ولا انتماء...ماء...ماء....بلا هم
اما الست المازون يا بنتى يا حبيبتى انا قلت النساء قادمون محدش صدقنى اشربوا بقى حريه....وربنا يخليلكم قاسم امين...!!؟؟ واهو دا بقى اللى سن سنه لا مؤاخذه سيئه حيفضل يتجازى بيها الى ملا نهايه...
تحياتى ليكى سومه_87