اول ما سمعنا ان سياده الرئيس هيزور محافظتنا المتواضعه ..البلد حالها اتقلب عواميد نور جديده .. شوارع مكسره بيعاد رصفها ..ايه ده يا جدعان البلد بتضف ولا ايه..قلنا ما علينا خير وبركه للبلد بردو.. بس كله كوم وحكايه الغسيل كوم تاني..
ممنوع نشرالغسيل..ليه يعني..ايه الناس متغسلشي يوميها
طب افرض حد غسل من قبليها وعايز ينشر..ايه الهدوم تعفن بقى وريحتها تطلع..اه وبلاش الراجل يلبس شرابه النضيف ويروح الشغل بشرابه المعفن اللي ريحته شبه ريحه البكابورت..ويزهق زمايله وممكن ياخد جزا كمان..والواد الصغير بلاش ياخد قميصه الابيض النضيف ويروح مدرسته بقميصه القديم اللي شبه صفار البيض وريحته مايعلم بيها الا ربنا ..وبعدين انا مش فاهمه ايه مشكلتكم مع حبال الغسيل..ايه مظهرها مش حضاري يعني..ويعني ايه اللي في مصر حضاري..ولا هي المشكله في المشابك الخشب..عامه في مشابك بلاستيك صناعه مصريه لا يعلى عليها هي صحيح حتطير الغسيل بس الوانها بتزهزه عالحبل وشكلها لطيف بردو
وبعدين هو الغسيل هيزعلكم في ايه..هي الناس بتغسل بميه نار لا سمح الله عشان تخافوا
عامه..شعب محافظتنا النضيف قوي بيوعد حضراتكم انه مش حينشر في اليوم المشهود ده اي غسيل "وسخ"لا مواخذه سيادتكم
التعليقات
اهلا بيكى
اهلا بيكى نيرفاندا ...المهم يا ستى معنى انه يتحط غسيل ممكن لاسمح الله حد من اهالى المحافظه يخبى سلاح فى البلكونه ولا الشباك ويطخ الريس من وراه وطبعا عشان يسهلوا مهمه مراقبه الشوارع ....لازم يمنعوا نشر الغسيل عشان النضورجيه اللى بيقفوا على سطوح المنازل وقت ما سياته بيعدى يعرفوا يامنوا المواضيع.....المهم ربنا يخليه وحرصا على سلامه حضرته منتشريش غسيل ونعيش معفنين ايه يعنى مش مشكله كله لسلامه سيادته...!!؟؟
وادعوله ادعوله.....!!؟؟
تحياتى ليكى سومه_87