السلام عليكم و رحمة الله و بركاته
أنا عاوزة أعرف رأيكم فى حاجه مهمة (أيه هيه دى )
الموضوع و ما فيه التعارف من خلال الشات و التعارف ده يدخل فى قصص حب بقة و بحبك يا حبيبتى و بحبك يا حبيبى و السهر على الكمبيوتر و فى الأخر لما البنت تجيب سيرة الجواز تلاقى الولد مش عرف يرد و البنت تبكى و تقوله أنت مش بتحبنى يقولها أنا عاوز أعيش عمرى كله معاكى يا حبيبتى بس أنا مش بفكر فى الأرتباط دلواتى أنتى أكيد عارفه ظروفى و يأخدها بكلمتين تروخ تنسى الموضوع و تبدأ تانى فى موال بحبك يا حبيبتى و بحبك يا حبيبى
و أخرتها يعنى؟؟؟؟؟؟؟؟؟؟؟؟
لما البنت دى ترتبط بشخص جاد و كويس و جه يتقدم لها هل ممكن تقوله على علاقاتها فى الشات ........ لا طبعاً
بس فى الاخر تكون هى خسرانه و خاصة لو الشخص اللى هترتبط بيه ده بيحبها
مش كده يا جماعة
على العموم أنا بنصح كل بنت أنها مش تتورط فى أى علاقه عن طريق الشات
و السلام عليكم و رحمة الله و بركاته
التعليقات
مررررررررسى يا جماعة
لا إله إلا أنت سبحانك أنى كنت من الظالمين
مرررررررررسى يا جماعة على تفاعلكم مع الموضوع و هقولها كلمة حياة الأنسان تجارب بمعنى أن الواحد عشان يعرف حاجه لازم يجربها بنفسه و طول ما أنت عايش لازم تجرب كل حاجه و مش تخاف من حاجه أومال هتعرفها أزاى لو ما جربتهاش بس فى ناس بتتعلم من تجارب الأخرين بس برده مش كل واحد زى التانى
اكتره كدب
كل الكلام اللى بيتقال على الشات بيكون نسبة كتير منه كدب.. والولد يقول فى وعود والبنت تصدق وتعيش احلام وردية وهى بتوهم نفسها وتصدقه..وممكن يحصل لقاء ويكون فى حاجات غلط من اول مقابله..والاحسن نبعد عن الشات والكلام دا .اللى نعرفه ونشوف تصرفاته بعنينا احسن من اللى يرسم صوره جميلة لنفسه ونصدقها...
اختلفت الاسباب
اختلفت الاسباب والنتيجة واحدة ان من تبحث عن تجربة حب او علاقة الايام دي تدخل النت زمان كانت تاخد البلاص وتفوت امام الشباب بعدين شوية بقت تتصل بالتليفون في كل عصر هناك الوسائل التي لا يعدمها الشباب او الانسان بوجه عام ذلك ان الحب مهما اختلفت رؤيتنا له انساني ! نيجي بقى على الخطوات ونظرة المجتمع وفرص النجاح والفهم السليم والتطبيق تختلف من وسط لوسط ومن مجتمع لمجتمع ومن شخص لشخص بس انا عموما ضد علاقات النت لانها "افتراضية" يعني مش واقعية انا طبعا مع الحب لاننا مهما شتمنا فيه وقلنا عيب يستمر الحب والمحبون وهو اجمل تجربة اذا كنا بالنضج والجدية اللازمة له وعموما كل جيل وله وسائله في الحب والعلاقات!!
Zianour
يا جماعة الحب
يا جماعة الحب اصلا عن طريق النت مينفعش لازم كل واحد يشوف التانى و يتعامل معاه عشان يعرفه كويس زائد ان اللى بيستخدموا النت مجموعة قليلة ومحدودة من المجتمع و من السهل واحد ينتحل اى شخصية و يدعى انه حاصل على شهادة كذا و ساكن ف الزمالك و لا مصر الجديدة وهوه بيتكلم من نت كافيه فى حى شعبى هوه يعنى حد شايف ولا عارف
كمان الاتنين بيتعاملوا من خلال الشاشات و لم يتعاملوا مع بعض بشكل مباشر و لما بيتقابلوا بتحصل صدمة كل واحد بيكون رسم صورة خيالية مش حقيقية عن التانى و ربما يكون قال له عن نفسه معلومات غلط.. بس على فكرة فيه بنات برضه بتكدب ع الولاد و تدعى سن او شهادة او مؤهل مش حقيقى
و تحياتى لموضوعك يا فيروز
ما حضرتك كوول
ما حضرتك كوول اهو يا اخ سيف امال كنت معقد الحكايه ليه ...!!؟؟اولا اهنيك على انك بدات تتفاعل معانا ولونك قلت ملكيش دعوه وعارفه ممكن ترد عليا تحرجنى لكن انا قلت حتقبلك بصدر رحب...
ثانيا موضوعك كويس يا فيروز بس خديها بقى كلمه اى علاقه غلط ولد وبنت سواء شات ...كليه شغل مادمت لم تكلل بارتباط رسمى دى غلط....لكن البنت الصح اللى تحكم علاقاتها فى كل مكان يعنى فى احترام متبادل فى كل مكان ...بنت بميت راجل زى ما بيتقال ومتسمحش لحد يتغطى حدوده معاها ....وبعدين يا بنتى الناس بتكون عشره عمر وتكتشف حاجات جديده فى اللى قدامها
بس خدى بالك ان النت احيانا زى ما ليه مضاره ليه فوائده ... واللى يستخدمه صح حيتعلم....بجد...والبنت اللى تعرف تتعامل كويس برا النت حتتعامل كويس جوه النت
لكن اللى داخله تضور على الحب والكلام دا منتظره ايه يجرالها..!!؟؟؟
تحياتى ليكى سومه_87
صح لسانك
صح لسانك
وباضيف لك صوتى واقول :
الزواج عن طريق النت ليس حرام على ما اعتقد ولكن نسبة طلاق المتزوجين عن طريق النت مرتفعة وذلك لعدة احتمالات إما عدم الصراحة أو عدم الثقة فبعض الشباب يشك في أن الزوجة ستستخدم الشات أو النت لمواضيع غير أخلاقية مما يترتب عليه الخلاف أما بالنسبة للشات الذي يتم في مواضيع محترمة ومفيدة أعتقد أنه ليس حرام ولكن الحرام الكلام في مواضيع غير أخلاقية وتتعارض مع الدين
بس انا الحمد لله لا ادخل الشات
جزاكى الله كل خير على الموضوع المفيد
دمتى بود
تحياتى اليكى: منسية