Mashy.com Blog Beta

 إزيكم يا جماعة وكل عام وكلكم طيبين مسلمين ومسيحين ، ويا رب العام القادم نكون جميعا أفضل

نعود لنور وحكاياته .. لنا انا وهو طقس (من طقوس) قبل النوم وهو الحكاية التي عادة ما تكون من تاليفي ثم المناقشة في الشأن العام .   وهو متحدث ممتع جدا وبصرف النظر انني امه إلا انني استمتع جدا من الحديث معه . مثلا : بعد حدوتة ورقة الشجر التي ألفتها ع السريع والتي اعجبته لدرجة انها اصبحت مقرر علي يوميا حكايتها،  بادرني بمنتهى الجدية قائلا  وهو يشير بالسبابة ومحذرا " ماما ماعدتيش تشتري لعب بلاستيك "  " ليه يا نور؟!"  "جه في النشرة في الجزيرة انها وحشة"  -"!!!!!!!ايه!!!!؟ " ولم اتمالك نفسي فضحكت " مين اللي قال لك الكلام ده؟!"  بكبرياء "انا اللي عرفته باين اللعب دي وحشة ولا اقول لك هاتي لي منها وخلاص!" واصررت ان اعرف من اين استقى هذه المعلومات وانا اعرف فهو تقرير بالفعل شاهدناه على قناة الجزيرة منذ فترة ، ولما راى اصراري خجل وعاندني بتغير الموضوع ، "ماما هما الناس اللي في التلفزيون زينا بني ادميين ولا ورق؟" " لأ طبعا زينا" -" طيب هما ما بيرحوش في حتة تانية؟"  -" بيروحوا طبعا" -"ازاي؟؟"   - عادي يا نور بيخلصوا شغلهم ويروحوا!

" ماما ، هي الصورة لما التلفزيون يقفل بتروح فين؟" ( تفكير عميق مني) 

-شوف يا سيدي الصورة دي بتيجي عن طريق حاجة اسمها ارسال ، يعني ايه - والله انا اللي مش عارفة اقول ايه بس- يعني فيه واحد بيبعتها والتلفزيون يستقبلها ، زي الميه بنيجي قي مواسير"

قاطعني قائلا "وهي اصلا الميه بتيجي منين؟"

- الميه بتيجي من النيل( انت عارفه) فيه مواسير بموتور بتشدها وبعدين ينظفوها وبعدين ماسورة كبيرة توزع على مواسير البيوت المتركبة فيها ، والكهربا نفس الشىء بتيجي في اسلاك وهي اللي بتمشي التلفزيون ولما الكهربا توصل الصورة تيجي لما نطفي الصورة تروح "

- وهي فين الاسلاك دي ؟

- في الحيطة لما نيجي نبني البيت قبل الدهان بيحطوا مواسير برتقالي وبعدين يوصلوا الاسلاك فيها والكهربا دي بتشغل كل حاجة في البيت التلفزيون والغسالة والتلاجة والموتور والنور....

-طيب النور بيروح فين لما نطفيه ؟

- زي ما قلت لك الكهربا توصل في اللمبة نفتح المفتاح يجي النور نقفل المفتاح يروح النور

- يعني هو بيروح فين يعني جوه اللمبة؟!

- لأ الكهربا (ملعون ابو الديمقراطية اللي جايبانا ورا ، دا بقوانين الايام دي الوالد والوالدة  ربونا ونحن صغار بطريقة يتحولوا بسببها للجنايات ومحاكم مجرمي الحرب !!!) الكهربا يا سيدي  هي اللي لازم تكون موجودة علشان اللمبة تنور ولما تفقل الكهربا النور يروح (دعوت الله ان يقتنع خاصة انني التي بدات اشعر بالتعب والنعاس) استغرق في تفكير ليوازن الامور ويحللها 

- ماما هو البانيو ده تحته ارض ولا فتحة كده

-البانيو تحته بلاط زي بقية الشقة

-هو ملزوق ازاي كده؟

-بالاسمنت والجبس،   بدا في الاسترخاء والتفكير وبدات جفونه ترتخي وهي اشارة انه سينام وهو سريع النوم بشكل مدهش المشكلة ان يتوقف عن التفكير لثوان ، فجاة التفت الي قائلا "ماما انتي قلتي انك هتديني 10 جنية" وهو وعد لا اعرف قطعته تحت اي تاثير وهو الاول من نوعه وتصورت انه سينسى لكن مين يا بابا !

- اه صحيح ان شاء الله الصبح نام بقى لو سمحت علشان الصبح يجي بسرعة ، - هو النوم جه في عينيك ؟ - جه جدا جه خالص يا نور  واغمض عينيه ونام 

في الصباح وبينما كنت بالمطبخ اذ بيد صغيرة تمسك بذراعي فوجدته مبتسما واجمل ما فيه هذه الابتسامة فقلت   " صباح الخير يا حبيبي ، نمت كويس؟ وفين بوسة ماما اصلك واحشني"

على كل هذه المشاعر الجياشة قال " ماما ال10 جنيه!! هاتيها علشات اطلع لتيتة اخلي سمر- عمته الصغيرة- تجيب لي لوري" - اصله مجنون ومهوس ومتيم بكل ما يسير على عجلات- "طيب افطر الاول" فقال بشىء من الغضب "ماما مش انتي قلتي لي الصبح اهو احنا الصبح اهو !!!"  ودفعتها عن يد وانا صاغرة وابتسم الابتسامة بنت الايه اللي تدل على الرضا وأخذها وهم بالمشي ثم توقف مطقطقا بفمه والتفت في اسف :  "ماما..... هي العشرة جنيه دي هتقضي؟؟!"    "نااعاام ؟؟!!!!!!"   ولم يغير تعبير الاسى على وجهه منتظرا المزيد فقلت " هات ياله ال10 جنيه، دا احنا ماكناش عيال بقى!! " فقال بسرعة "لا لأ خلاص خلاص موش مشكله بقى!" 

وعندما صعدت لشرب الشاي مع حماتي العزيزة حكيت لها موضوع ال10 جنيه فردت" اتاريه طالع يقول لي تيته هو انتي ماعكيش 20 جنيه علشان ال10 ج دي موش مقضية!!" وطبعا متخيلين تعبير الاسى والطقطقة على وجهه!!!