الصفحة الرئيسية › Category › إجتماعيات

اللى بيته من قزاز ...؟

سبت, 2007-09-08 11:40 — loly

 السلام عليكم ورحمة الله

كل سنة وانتوا طيبين بمناسبة الشهر الكريم يارب تكونوا بخير

فى مثل بيقولك اللى بيته من قزاز ميحدفش الناس بالطوب

اللى هكتبه النهاردة عن عيوبنا كل انسان فينا عنده عيوب مفيش حد كامل والغريب ان كل واحد فينا عارف عيوبه كويس اوى لكن المشكلة فى ان قليل اوى منا اللى بيحاول يصححها او حتى يعترف بيها كلنا مبنحبش حد ينتقدنا او يظهرلنا عيوبنا اللى احنا عارفينا كويس

ناس كتير مننا لما تبينلها عيوبها بتحاول تبرر لنفسها الغلط او العيب دة بحيث انها متطلعش غلطانة بردة وكأن كل واحد مننا كامل وكانه بردة شايف نفسه اعظم واحد فى الكون وديما كلنا مظلومين ؟؟!! امال الظلمة راحوا فين طيب

تيجى تسأل ظابط شرطة بتعذب  دة ليه يابنى يقولك دة شعب ابن ... مبيجيش غير بالضرب ؟؟

تيجى تسأل ام او اب قاسيين مع ولادهم يقولك انا متبهدل و طافح الدم عشان ااكلهم واعلمهم فى بلد زى دة ؟؟ ويعنى لو كنت كويس معاهم كان هيجرى ايه؟

تيجى تسأل حاكم مبهدل بلده ومجوعها ومضيع كرامتها بتعمل كدة ليه يقولك احنا بلد ديموقراطى مفيش الكلام دة دة كله افتراءات ؟؟

ليه لما حد بيعرف ربنا ويربى دقنه او تلبس النقاب او الحجاب يبقى ارهابى ومتمسكين برأيهم ان اللى الناس دى كدة فعلا؟؟

ليه الناس قافلة مخها ومش عاوزة تفكر فى غلطاتها وعيوبها وتصلحها ؟؟

فى ناس منا بتتعرض لصدمات جامدة بتخليهم يشوفوا نفسهم كانهم واقفين قدام مراية عرايا وتحاول تصلح عيوبها وفى ناس منا بتفضل عايشة على المبررات وكأنها الفيتامينات اللى عايشين بيها عايشين على الكدب على نفسهم وعلى الناس

ليه كلنا بنحاول ننتقد فى بعض ليه محدش فينا بيبص لعيوبه ويصلحها .؟؟ كام واحد فينا عمل كدة فعلا؟؟؟

على العموم انا هبدأ بنفسى الاول ..

دى شوية جمل يارب تفيدكم تحياتى ليكم

  1. = تأمل العيب عيب
    = يقول على بن أبي طالب – رضي الله عنه - : من رضي عن نفسه , كثر الساخطون عليه .
    = يقول سقراط : لاتردنَ على ذي خطأ خطأه , فإنه يستفيد منك علماً , ويتخذك عدواً
    = تستطيع أن تكتسب ثقه الجاهل , إذا لم تعارض في أرائه .
    = الحقيقه مثل النحله ؛ تحمل في جوفها العسل , وفي ذنبها إبره .
    = يقول السباعي – رحمه الله - : لو أنك لاتصادق إلاإنسانا ً لاعيب فيه , لما صادقت نفسك .
    = من يناقش الأحمق عليه أن يتحمل إجاباته .
    = يقول براتراند راسل : الحياه أقصر من أن نقضيها في تسجيل الأخطاء التي أرتكبها غيرنا في حقنا , وفي تقوية العداء بين الناس .
    = يقول شوبنهاور : ذوو النفوس الدنيئه , يجدون اللذه في التفتيش عن أخطاء العظماء .
    = يقول ميخائيل نعيمه : من كان لايبصر غير محاسنه ,
    ومساوئ غيره فالضرير خير ٌ منه
    = ليس هناك خطأ أكبر من عدم الإعتراف بالخطأ
    = يقول فولتير : النزاع الطويل يعني أن كلا الطرفين على خطأ
    = الذين يعيشون على أعصابهم , غالباً مايعيشون على أعصاب الآخرين أيضا ً .
    = قيل لبعض الحكماء : بــِــمَ ينتقم الإنسان من عدوَه ؟ فقال : بإصلاح نفسه .
    = يقول سعيد بن المسيب – رحمه الله تعالى -
    : بلغ عثمان بن عفان – رضي الله عنه – أن قوماً على فاحشه فأتاهم , وقد تفرقوا , فحمد الله وأعتق رقبه .
    = اخجل من عيوبك , وليس من تصحيحها .
    = من تتبع خفيات العيوب , حرم مودات القلوب .
    = الندم هو إكتشاف الخطأ بعد فوات الأوان .

التعليقات

سبت, 2007-09-08 13:54 — somaa_87

فعلا لولى احنا 

فعلا لولى احنا  مبنعترفش باخطائنا بس تقولى ايه بقى فى اللى عارف كل عيوبه واخطاءه بس مش عارف يصلحها ومش شايفلها حل ......ربنا يهدينا يا رب جميعا

وحشتينى قوى حاولى تدخلى على الساعه 10 النت لو تقدرى يا سكره

تحياتى ليكى سومه_87

سبت, 2007-09-08 21:59 — walidzaki

شكرا ليكى لولى

شكرا ليكى لولى على الموضوع الهايل دة

انا عاوز اضيف كمان انه مفيش أنسان خالى من العيوب

مفيش حد كامل غير رسولنا الكريم

بس المصيبة فعلا ان الانسان لا يحاول ان يعالج عيوبه ويتجاهلها أويعتبرها مميزات

وياريت بقى كل واحد يحاول يصلح نفسه وننسى بقى الحرب الكلامية الدائرة الان

الناس طلعوا القمر وياما عملوا واحنا لسه محلك سر