السلام عليكم ورحمة الله وبركاته

قبل ما اتكلم عن حاجة عشان الناس احسن تفهم غلط انا مسلمة يا جماعة موحدة بالله عز وجل ورسوله محمد صلى الله عليه وسلم ومعرفش غير القرآن الكريم

وقبل اى حاجة تانى انا بس بنقل معلومات للناس عشان تعرف مش اكتر

حد فيكم سمع عن الدين البهائى او حضرة بهاء الدين المدعوا بالمبشر ؟ اللى مسمعش يسمع ويدور فى الموضوع ويفهم الموضوع دة لسة جديد عليا الحقيقة اول مرة اعرف ان فى دين اسمه البهائى ..الدين دة اللى عرفته عنه انه معترف بكل الاديان اللى اعرفه من الاديان المسلم والمسيحى واليهودى لاء هما كمان معترفين بان فى نبى اسمه بوذا وكرشنا ومعاهم رسالة الحقيقة اللى اسمع عنه بوذا انما التانى اول مرة اسمع عنه بصراحة ندخل فى المهم

الموضوع بدأ ازاى بدأ الاول  المبشّر بحضرة بهاء الله (١٨١٩-١٨٥٠) حضرة الباب ..مذكور فى الدين البهائى ان تاجر شاب اعلن نفسه على انه مبشر بحضرة بهاء الله وانه صاحب رسالة الهية وكان ظهورة فى شهر مايو 1844 وكان اسم الشاب دة سيد على محمد ولقب نفسه باسم الباب واتعرف بالاسم دة ..وبشر بأن فى رسول قادم وانه اعظم الرسل وانه هيجى برسالة سماوية وحث حضرة الباب اتباعه انهم ينتظروا بهاء الدين ويكونوا من اتباعه ويؤمنوا بيه..

وفى عام 1848 ظهر واحد من اتباع الباب اتخذ واحد اسمه حسين على لقب البهاء واتعرف بأسم بهاء الله وكان حسين على من اكبر اتباع الباب ووقف جمبه الباب وشجعه وايده  

حضرة بهاء الله المسمى ب صاحب الرسالة الإلهية (١٨١٧-١٨٩٢) ولد حسين على فى بلاد فارس فى القرن السابع عشر مولود لعيلة غنية وصاحبة ثراء ورفض يمشى ورا والده فى بلاط الشاة وقرر يمشى فى طريقة واعترف بانه أمن برسالة الباب وبناء عليه اتنفى حسين على عن بلده واتسجن فى سجن عكا لحوالى اربعين سنة وخلال سجنه كتب كتب كتير جدا وكان بيكتب ويدعى انها آيات الهيه وكتب فيها ما يزيد عن مائة سفر مجلد وكان من ضمن كتابته الكتابات المتصوفة وبعض التعاليم الاجتماعية والاخلاقية والاوامر والاحكام...ومات حسين على المسمى ببهاء الدين فى السجن 1892 

حضرة عبد البهاء مركز العهد والميثاق (١٨٤٤-١٩٢١) كان ابن المسمى ببهاء الله ومكمل لدعوته وكسب عدد كبير من الجمهور والمؤيدين تعدى عددهم الالاف وعرف بانه سفير للسلام ونصير للعدل وسافر للعديد من دول العالم لنشر دعوته هو ووالده

جه بعده حضرة شوقي رباني وليّ أمر الدين البهائي (١٨٩٧-١٩٥٧) حفيد حضرة عبد البهاء ومسك زمام الامور بعده ومشى على الطريق اللى كان راسمه ليه جده فى كتابه عن شريعة دين البهائى وتأسس فى عهد ولى امر الدين بيت العدل الاعظم وكان ليه ادوار كبيرة فى توسيع الدين البهائى وتوسيع الجامعة البهائية وتوسيعها

بيت العدل الأعظم المركز البهائي الإداري العالمي وظيفته هى الاشتراك الجماعى فى اتخاذ القرارات وتنظيم التعاملات الاجتماعية  واهم وظايفة المحافظة على حرية الاشخاص وحلال العدل

ما علينا دى المعلومات اللى جمعتها وكتبتها عن الدين بالبهائى القضية المطروحة دلوقتى فى مصر ومرفوعة ضد البهائيين فى المحكمة وهيتم الحكم فى الطعن يوم السبت القادم الموافق 2/8

الحقيقة انا مش ملمة بالقضية اوى اللى قدرت اوصله ان القضية مرفوعه ضدهم وناس بتطالب بصلبهم وتقطيع اديهم وشخص اسمه احمد عزت صور فيلم تسجيلى مع اشخاص اعتنقوا الدين دة مصريين واتمنع عرض الفيلم دة فى مصر والحكومة حذرته من نشره

http://www.youtube.com/watch?v=x85cjShP6Sg

دة لينك الفيلم للى عاوز يشوفه

وللعلم عدد اتباع الدين البهائى دلوقتى عدى الستة مليون شخص فى جميع دول العالم كله ..

انا خلصت موضوعى ياريت اكون افادتكم واللى عنده معلومات ياريت يزود عليهاويا جماعة الموضوع مش منقول انا مش ناسبة اى مجهود غير ليا دة مجهودى الشخصى 

ياما هنشوف ..