يا عينى على الزمن اللى مبقاش فيه صاحب يتصاحب ولا حبيب يتحب ولا ايد غيرك ايدك تمسح دمعتك

الكل بيخون ومحدش بقى بيصون العشرة ...يمكن الواحد بيختار غلط مرة واتنين وتلاتة واربعة بس لحد امتى هيختار غلط

يا ترى مين الصح فينا انا ولا هما والعيب فيا ولا فيهم ولا الطيبة معدش ليها وجود بقت حاجة منقرضة ..اة لو لاقيت واحد طيب ابقى حطه فى المتحف اصلها بقت عملة نادرة خليك فاكر دى اوعى تنسى وخليك فاكر نقطة مهمة كمان طول ما ايدك جمبك لو دمعت مترفعش غيرها تمسح دمعتك ومتفكرش انك هتلاقى حد هيبقى جمبك ويحن عليك ويمسحهالك

طيب الاب والام بيخلفوا ليه لما كل واحد بيرمى عياله وينشغل فى حاله هنقول حال الدنيا والفلوس والحكومة والقرف طيب وتدمر عيالك معاك ليه متتنيل متخلفش مدام هتجيبهم تقرفهم معاك وتكرهم فى حياتهم وفى نفسهم وتكرهم فيك انت شخصيا

سألت واحد مرة الناس بتخلف ليه قالى عشان تعذب ولادها ..طيب وليه متخفى ولا تغور تعذب فى نفسك بدل ما تقرف الخلق معاك

اضحك وهزر واعمل انك اسعد واحد فى الدنيا وانت وحيد ومفيش اتعس منك ولا لاء فى منك كتير بس بنسخ تانية والناس تقول يا بخته مبسوط وفارد وشه وبيضحك اكيد معاه فلوس كتير والناس مش عارفة اللى فيها اول ما بتروح تقفل على نفسك اوضتك وتشيل هموم الدنيا على كتافك ومش طايق حتى انك تعيش ولا تتنفس  

يقولك دة بيضحك كتير مش شايل للدنيا هم لاء دة من همة بيضحك هيعمل ايه مهو ياما بكى وعيط لما قلبه وجسمه اشتكى من الهم والنكد

من الاخر كدة متحكمش على حد وسيب كل واحد فيه اللى مكفيه وحاول لما حد يحتاجك خليك جمبه مين عالم انت امتى هتحتاجه

بس بردة مش هدى امل ان حياة الواحد تتغير ولا الزمن يتغير ولا الحكم يتغير ولا انا شخصيا اتغير

ياريت حتى الواحد نفسه يرجع طفل تانى الا ما هو طفل زى  ما هو كبير

معلش لو جبتلكم اكتئاب بس اعذرونى ما بدل ما اطق اموت

اضحك الدنيا بردة هتفضل زى ما هى ...