السلام عليكم ورحمة الله وبركاته

قبل ما ابدا كلام فى اى حاجة احب اعتذر لاختى سوما متزعليش منى عشان خلفت بوعدى معاكى انا كنت مسافرة ولسة راجعة ونفسوياتى تحت الصفر الحقيقة فعشان كدة مقدرتش التزم بوعدى من ناحيتك معلش ووحشتينى جدا على فكرة بجد

وبجد باقى الناس الجميلة اللى اتعرفت عليها من البلوج وحشتونى كلكم

ادخل بقى فى الكلام انا اخدت بالى طبعا من التغييرات فى البلوج وتحديثة بصراحة بقى اجمل واحسن من الاول بكتير دة بالنسبة للشكل العام انما جيت ادور على مواضيع اقراها للاسف كله مواضيع منقولة المشكلة ان الناس هنا مبتديش اى اهتمام من اللى بنقوله عن البلوج وعن طبيعة العلاقة وايه اللى موت البلوج وخلانا نبعد عنه بعد ما كنا بنصحى عشان نفتحه وشىء اساسى كل يوم زى الاكل والشرب الناس الجديدة مش هتدى لكلامى اى اهتمام زى ما حصل قبل كدة لكن مش مشكلة المهم الناس اللى بدأت تكتب معايا او قبلى عارفة وفاهمة انا بتكلم عن ايه

احنا طلبنا منكم اكتر من مرة ان انتوا تفهموا ان فى منتديات على الموقع ودى للمواضيع المنقولة وللكلام العادى وان البلوج اصله معمول للمدونات الشخصية والاراء اللى بتجمع بينا وعاوزة افهم ايه وجهه النظر ان كترة المواضيع المنقولة اللى مبتتقريش وبيتعدى عليها مرور الكرام ايه الفايدة ؟؟ تضييع وقت ولا فراغ ولا لفت انظار مع انها مبتلفتش بالمرة ولا ايه؟؟ وايه وصلنا للملل والزهق والناس مبقتش تدخل ومعدش فى امل اننا نساعد بعض او نتكلم مع بعض زى ما كنا ؟!!

نفسى متعدوش على كلامى مرور الكرام المرة دى وتقروه وتفهموا القصد ايه مش كتر مواضيع والله واى كلام ليه الناس متكتبش اى حاجة برأيها هى واحنا باختلاف الاراء والخبرات ننقدها وسواء انتقدناها انها كويسة او مش كويسة فا فى الحالتين هيتبنى خبرة واللى بيكتب ممكن يغير وجهه نظره

عايزة اعرف حاجة كمان هو الدنيا حواليكم فيها فراغ اوى كدة لدرجة ان من كتر مللكم مش لاقيين حاجة تكتبوا عنها ؟

ياريت مكونش ضايقت حد من الموجودين ومعلش للتطويل بس بجد بلاش تزهقونا من البلوج الحاجة الوحيدة اللى بنطلع فيها قرفنا وزهقنا من الدنيا ونتكلم فيها وياريت تشاركونا كمان

سلامى للكل ياريت يوصل لكل واحد فيكم وانا عن نفسى هبدأ اكتب تانى واتمنى اشوف كدة بردة من الكل عشان نشجع الباقيين بالكتابة

سلام عليكم