Mashy.com Blog Beta

موضوع النهاردة مهم
واحب امسي او اصبح عليكم  على حسب ما انتو فاتحين الرسالة

عادة بحب اقرا الجورنال كل يوم من كام يوم استوقفني خبرين
غاية في الاهمية
الاول

مسك عدة شبكات من الجواسيس
ازاي كل الجواسيس دول موجودين وسطنا واحنا شغالين رغي
وكله بيتكلم عن شغلها وكانه ولا  رئيس شركة الرمال المتحركة
وعمال يحكي تفاصيل اكيد بتفيد الاخوة اللي بياخدو مرتبات دولارات
واكيد طالمااتمسك  واحد واتنين وثلاثة يبقي فيه غيرهم كتير
اخرهم دكتور العطار وهو دكتور ذرة وكان في مفاعل بلبيس
وشبكته من ياباني واخر اوروبي
طبع مش هنتكلم الا لما التحقيقات تخلص
ليه بيحصل ده وليه بيقل الانتماء
وغيره بيتهرب من الجيش وغيرهم كتير
زي تامر حسني اللي عمال يغلظ في صوته هو وهيثم شاكر
مصر اللي بنحبها وكده
لو حد عنده تفسير يعني ايام الحرب
والكساد مكنش بيحصل ده
 هتجنن ايه مبررهم

الخبر التاني
وهو لا يكاد يستوقف حد لانه خبر غريب وضد الانسانية
ومنطوقه  رجل يقتل ابنه السنتين خوفا من الفقر
والله جالي نغزة في قلبي وحسيت لدنيا بتلف بيا
وحطيت نفسي مكان الرجل ده اللي قتل بنته واعترف مانكرش بل هو بلغ عن نفسه
والغريبة مش حاسس بتعذيب ضمير
لو يعرف ان المال والبنون زينة الحياة طب ازاي
حاولت افهم
حادثة غريبة على مجتمعنا
اعتقد احنا كلنا قاتلين معه لاننا اصبحنا على قدر
عالي من الانانية وكل واحد طالما في حاله ومكفي بيته يبقى خلاص ما كل هذا القدر من السالبية
ليه مفيش تكافل بينا
ازاي الرجل يوصل لكده من الانهيار
والخوف من المستقبل الذي لا يعلمه الا الله
هل وصل بنا الحال لذلك
فكرت اكيد عاطل ومعهوش يصرف الغلط انه اتجوز ومعهوش فلوس وخلفها بس الامر الواقع بيقول نقف
جنب الفقير منا  فين التكافل اللي  بيامر بيه الاسلام
فين طيبة القلب وليه محطهاش في ملجأ مثلا
والله العظيم اعرف حد من قريباتي  والدرجة الاولي بيرعى واحدة
لقيتها على باب جامع والله حصل وعلى يدي لانها كان عنده الصفرا يعني ميتة ميتة
يعني اللي رمها كمان مش مستعني يعالجها رمها زي الزبالة جنب الحيط
ايه الناس ديه واحدة بتغلط وترمي ابنها والتاني بيخنق بنته
هل ازيلت من قلوبنا الرحمة ام ماذا؟
لقد قال الرسول انا وكافل اليتيم كهاتين في الجنة واشار بالسبابة والوسطى
يا جماعة لازم نتحرك اعتقد لو كل واحد خرج اللي يقدر عليه
مش هيكون في مشكلة
لا يوجد فقير الا من بخل غني وده حديث تاني يحث
على العطاء كل في مجاله
الزارع والصانع الدكتور يعمل يوم مجاني
والزارع يطلع محصول  والحرفي يطلع من انتاجه
او فلوس او اعانات  واللي معاهوش يروح اي ملجأ
ويعطف عليهم ولو بسمة او يلعب مع الاطفال دول والله
متتخيلوش ده بيبسطهم اد ايه وجربو مش هتندموا انا عملت ده مرة
ومبطلتوش الا عشان مشاغلي والله الاطفال دول غلابة ويستاهلو مننا اكتر من كده
واقترح لو يتعمل بنك او بيت مال زي ايام زمان
للانفاق على الارامل واللقطاء واليتماء والمحتاجين
ويكون بيت المال ده تحت امارة حد موثوق في اسلامه واخلاقه
ويفتح حساب بكل البنوك
ونمر تليفونات موبيل للتبرع بدل
رنة لحبيبك وسمعه اغنية والهلس ده مش ده احسن
لما نوينا نعمل مستشفى الاطفال اتعملت وبالجهود الذاتية
يا جماعة احسن حاجة تعملها تسيب للاخرين ارث من الخير لانه
سيدوم لكن ما تفعله لنفسك سيذول بموتك
اقترح حملة الجنيه الواحد
كل من له مرتب ثابت يخصم منه جنيه مش هياثر معاه
ويخش في صندوق بيت المال للتمويل مشاريع خيرية
وقروض للشباب العاطل ومشروعات انتاجية مش موبيلات وسنترالات
اتصالات لا تنتج ولا تغني من جوع
مش عارف كده تصور كويس ولا حد عنده اضافة على تصوري
ياريت يبعت ويعرفنا
عشان منلقيش شاب في عمر الزهور بينتحر
او رجل بيقتل بنته
او اولاد شوارع نتاج فحشاء
والله اللي عند ربنا مش بيروح وجربو كده مرة وطلعو ولو ربنا موسعش عليكم
مطلعوش تاني
يارب اكتب ده في ميزان حسناتي وارجو نشر المشروع وان
ترسل رسالتي لكل  ايميلاتك
والحسنة بعشرة امثالها

هو مين مع مع مين ولا ايه اللي بيحصل
مرات افكر هو انا ميولي ايه واللي بعمله ومقالاتي ديه
بتاثر في حد ولا لأ الخلاصة لو حد جالي
من الاخوة اللي بالكم فيهم هروح فطيس ولا هكون فعلا ساهمت في تغيير
دماغ حد و تفكيره
حاسس اني بكتب لنفسي  ويمكن لو حد دقق انا متزن مش مع حد ولا ضد حد
ليا وجهة نظر وعمري ما غيرتها عشان اكون مع حد او اكون في حما حد
انا شاب مصري بسيط
ومش مع دول او دوكهما وعمري ما هتلون بلون حد
كل اللي بتمناه من الله اني يكون مجهودي ده بيلقى استحسان حد ولو حد
بقى معايا يعرفني ولو مع التانيين يعرفني برضه
ساعات بيجيلي ايميلات من ناس بتشتم عشان راي او قضية اثيرت
مرة واحد قعد يتكلم عن الاسلام وقال بيحارب عنه
وفي مرة بعت يطلب صور ممنوعة واباحية
 طب اصدق ازاي كلامه
يعني من الاخر هو عرض اراءنا ديه ليه لازمة ولا نفضها سيرة ونسكت
ايام زمان كان ليا مفكرة اقعد ادش فيها بكل ما تساور بيها نفسي  وافضفض بالساعات
ومكانش حد بيشاركني ابدا لكن دلوقتي
اي حد ممكن ينشر افكاره على النت و يعمل مدونة وكده
حرية الرأي كويسة بس المهم الطريقة اللي بنعرض بيها اراءنا
ياريت لو فيه
feed back
كويس اعرفه منكم واحس ان تعبي ده ليه مقابل من ناس بتقرا
وبتحاور واحس ان في حد معاي ومش مع التانيين