صباح الخير
من قد ايه بقولهالك
صباح الخير
يا وش الخير
يا قدم السعد على بابى
يا ناسى وكل ما ليّا
يا اجدع واحدة ف صحابى
صباح الخير
كأنك لسه أمنيّه
وانا العاشق
وبتمنى يادوب لمسه
ولما الحلم يتهوّر...
أغمض عينى ..نفسى اسمع
حبيبي إصحى
وكنت ساعتها بسمعها
(وانا بتمنى اسمعها)
وكنت بحس لمسه إيد تصحينى
أفتّح ف الخلا عينى
ألاقيكى ...قصاد عينى
جميلة بشكل مش ممكن
ف غاية غاية الرقة
وآخر منتهى الروعة
كليوباترا
فينوس... ولا
زليخة مرات عزيز يوسف
ألاقينى
مانيش عارف ..اضمك جوة جوايا
لأنك مالية جوايا
بحدوتتين.....وضحكاية
عنيكى... أحلى حدودتتين
بيحكوا حكاية العاشقة
اللى ملهوفة
ويحكوا حكاية الانثى
اللى مكسوفة
وانا الواقف ومحتار بين حواديتك
وبين فك الرموز الصعب
عيون
مشوارها ابعد من ملاذ الروح
ملامح
كل مافيها نِدا ع الروح
شفايف
ساكته بسمعها..بتعزف ناى
ما تسألنيش سمعت إزاى..؟
مانا العاشق وبتمنى
أحس بقلبك السكر
بيعزف حب
يا أحلى متاهة واخدانى
ما بين حبك
وبين فك الرموز الصعب
صباحك طفل بيصبّح على عنيكى
بشمس كفوفه لو طبطب.. يدفيكى
وياخد نوره من ضحكاية بعشقها
فيرسمها على خدودك
بنانى حمام
ويزرعها على جبينك
كطوق ياسمين
ويبنى قصر من مرمر
على جيدْك
صباحك طفل بيلاعبك كما الاطفال
يلاعبك لاستغمّاية
اخبيكى ف حبابى العين
ومن عينى
يلاعبك أولى
أرسملك على صدرى مكان لعبك
تنطى الحبل.........؟
مش ممكن..إيدينك ناعمة
على ايدك.. حتبقى أحنّ شرايينى
مابين الحلم والحاصل
يادوب تغميضة
كنت كتير بغمًضها
سنين عدت ...ولسًّانى
بطوق ياسمين على جبينك
بقولٍك ...أمر مولاتى
ولسَّانى ...على باب قصرك المرمر
أنا الحارس
يا أول أولوياتى
ولسه برضه ببدر قمح
فوق خدينك الشايلين
بنانى حمام
ولا قادر أكون صاحى وانا بحلم
ولا قادر اسيب بابك
ثوانى وانام
مخليّه..مافيش فيّا
خليه إلا صارخة يارب
يرسينى على مرسى
مابين حبك
وبين فك الرموز الصعب