archives
غــــــــــــزة.... فعلاً؟!
ثلاثاء, 2008-03-18 21:26 — Zianour
هاوطي صوت التلفزيون
احتراماً للجثث..
وهلاقي طريقة
أقنع بيها نفسي
ان اللي ع الشاشة مجرد فيلم
دخل بالغلط في نشرة الاخبار..
بعد ما ينتهي التصوير
الأمهات
هيمسحوا دموعهم
وهيصحوا العيال عشان معاد الرضعة
وهما بيفكوا الكفن عنهم
بشويش..
الشباب المرمين ع الارض
(قال يعني مقتولين)
هيقوموا وهما بيضحكوا..
وهيشتموا المخرج في سرهم
لأنه بهدل هدومهم ميكركروم
وبويا حمرا
اكتر من اللازم..
عربية الاسعاف
هتطلع مجرد ديكور
مافيهاش موتور اصلاً..
العمال اللي ف الاستديو
هينتظروا -بنفاد صبر-
خروج الجميع..
وف ظرف 5 دقايق
هيفضوا المكان
عشان تصوير المشهد الجديد
اللي مش محتاج
غير مؤلف واقعي..
محمد خير
الدستور عدد 5 مارس 2008
الى الناس الكويسة
ثلاثاء, 2008-03-18 09:18 — engy666666السلام عليكم و رحمة الله و بركاته :
ازيكم جميعا
....انا بقالى كتير مكتبتش بس انتوا عارفين الدنيا مشاغل....
انا بس كنت عايزة اخد رٍأيكم فى حاجة....هو الللى احنا فيه ده صح؟؟ يعنى ...مظاهرات و احتجاجات و عيش سورى (قصدى مفيش عيش) و محاكمات....و اخوان مسلمين و دكاترة و قضايا
بس يا ترى فعلا المسئولين معتقدين ان الشعب مرتاح..هل هم للدرجة دى مش حاسين بينا خالص؟؟؟؟ ماعتقدش .... بس هو اكيد اللى ايده فى المية مش زى اللى ايده فى النار... بس تعرفوا الغلاء ده وسيلة فعالة جدا للقضاء على الشعب بسرعة...انتوا تعرفوا طبعا ان الزيت غلى و مافيش حد حيقدر يستغنى عن الزيت و لكن اللى حيحصل ان بدل ماكل شوية تغير الزيت ..لا ..تستهلكه 3..4..5 مرات و بعدين ترميه ..تعرفوا بقى ان الزيت لو اتقلى بيه مرتين تلاتة بيجيب سرطان ...و اهو كدة الحكومة ملهاش دعوة...انا سمعت عن سائل بيحلل جسم الانسان و مايتفضلش فيه ولا حاجة ....ممكن يبقوا يجربوا الاختراع ده فى شعبهم ..... و دى بقى تبقى الجريمة الكالمة....
بس اكيد الحكومة مش محتاجة لافكارى ...الوسائل عندهم كتيرة.... ربنا يزيد و يبارك.....
انا مش عارفة حاسة انى بهيس ..معلشى اصلى لسة شايفة مظاهرة من كام يوم(اول مظاهرة اشوفها فى حياتى)
اما دلوقتى ايه الحل ........مفيش ...لكن زى ماكتبت قبل كدة "لا تأتى خيوط ضوء الفجر الاولى الا بعد احلك ساعات الليل ظلاما" يعنى خلاص اكيد الفرج قرب..قولوا يا مسهل...بس تعرفوا برضه العيب فينا علشان احنا بعدنا عن ربنا و عن الايمان...و دول مجرد عقاب لينا ....شوفتوا بقى الحكومة طيبة و احنا بس اللى ظالمينها ازاى ..ربنا يقويها كمان و كمان و ينصرها على مين يعاديها
سلامى للاعضاء القدام و الاعضاء الجداد و كل الناس الكويسة
اختكم انجى