مما لا شك فيه ان كل بيت في مصر المحروسة به ما يسمى "تلفاز" ومما لا شك فيه برضه انه لكل "تلفاز" ريموت كنترول اي جهاز التحكم عن بعد ، (لو فيه حاجة صعبة على الفهم يرجى التعليق وساقوم بالشرح..)

والحقيقة انني لا احب التلفزيون على الاطلاق ولولا ان زوجي يهتم بقناة الجزيرة وقناة اليوم ما فتحته على الاطلاق ومعلوماتي التلفزيونية ضعيفة جدا  استمدها من زوجي العزيز ومن نور حماهما الله وانا لا افتحه مطلقا لو لوحدي اما اذا الح نور (وانتم عارفين بقى الحاحه!!!) افتحه على شىء غير عنيف او احاول !!!

وقد قرات انه بعد العام السابع للزواج وبعد تبخر الرومانسية تبدا المعارك على مناطق الحدود والنفوذ وطبعا الريموت كنترول من مناطق النفوذ التي يدور حولها اشرس المعارك ولان نور الله يحميه يعرف جيدا كيف يستخدم الريموت كنترول فقد اراد الله الا نحرم من تلكم المعارك اليومية بين نور وابيه!! وهي المعركة التي بدأت فعلا تثير اعصابي وتتضخم يوما بعد يوم ويتسع الشقاق يوما بعد يوم بين الولد وابيه بسبب الريموت وبدأ الموضوع بشكل هادىء كالتالي

مشهد 1

(ابو نور يشاهد نشرة الاخبار نور يأتي من حجرته يمسك بالريموت ويبدأ يقلب - ينتبه ابو نور)

- ايه ده مين الي قال لك تقلب

* (نور يضحك ويستمر في التقليب ) عايز اشوف الاطفال

- هات يا حبيبي الريموت ( بهدوء) هات يا بابا الريموت

* (نور ما زال يقلب)

- (بدأ ينفعل) نور نور نورررر مش سامعني باقول لك هات الريموت؟؟؟!!!

* (نور يقلب ويجد القناة التي يريدها فيجلس مبتسما على الاخر)

-(علامات ذهول من ابو نور ، غضب مكتوم يترك الساحة ويدخل جوه )

------ (صمت من الجميع نور يشاهد التلفزيون بابا زعلان انا عاملة مش واخدة بالي)

بعدما ينتهي نور من التلفزيون بعدها بساعة يذهب ليتحدث مع بابا ، ولكن بابا ما زال غضبانا يندهش نور ولا يدري لماذا لا يرد بابا

* بابا انت ما بتردش ليه

- (بابا ينظر في صمت بغضب ) يأتي نور جزعا هو بابا ما بيردش علي ليه يا ماما ؟

/ علشان قلبت التلفزيون من غير استئذان وبابا كان بيشوف النشرة وكده عيب يا نور!!

* معلش يا بابا يا حبيبي انا كنت عايز اشوف البرمانج(يعني البرنامج) التاني

-بابا ينظر ثم يبدا يلين ونور مش عاطي له فرصة بوسه وحضن ومعلش يا بابا  فطبطب بابا وانتهى الموضوع

مشهد 2

بابا برضه قاعد يتفرج على النشرة وجاء نور ولانه ولد مؤدب استأذن ولان بابا مندمج في النشرة لم يستمع وبدأ نور يقلب القنوات ونفس رد الفعل 

- مين قال لك تقلب؟؟

* انا استأذنت وانت ما رديتش علي فقلبت 

- ايه ده هات الريموت (بحده) هات الريموت 

* نور يخاف فيرمي الريموت ويأتي بسرعة لماما

* (خائف وغضبان) شوفتي جوزك بيزعق في ازاي هو تلفزيونه لوحده ولا ايه؟؟

/ (انا هاموت واضحك) عيب يا نور بابا عايز يتفرج على النشرة

*(يصبر قليلا تنتهي النشرة يذهب لبابا) مش النشرة خلصت؟ هات بقى الريموت

- (لا رد بل نظرة غاضبة) 

* (نور يأتي لماما ) شوفتي بقى انا عايز اتفرج على البرمانج  مش هو اتفرج على النشرة كل ساعة قدام التلفزيون وانا مش عارف اتفرج (نور يزعق)

/ الزعيق عيب يا نور

* (والدموع في عينيه) لأ مش عيب انا عايز اتفرج ،( ثم يهدي اللعب وياخذ بيدي)  تعالي يا ماما هاتي الريموت منه

/ (اححم) خلصت التلفزيون؟

- (ابو نور ينظر لي نظرة غريبة) ايه ده هو هيمشي كلامه علينا ولا ايه

/ _(مستعطفة) معلش هو هيتفرج شوية صغيرين وبعدين تعال انت !

-(مستسلما) ماشي يا كلب عايز ايه 

* (نور سعيدا) انا اللي هاقلب

- (معترضا) لأ انا الي هاقلب لك عايز ايه

*(نور يعترض) انا عايز اقلب واشوف اللي يعجبني

/ قلب له وخلاص ولما تيجي حاجة حلوة يبقى تسيبها

(نور سعيد ، ابو نور متحفز)

مشهد3 

نور هو اللي قدام التلفزيون ابو نور جاء من الخارج وعايز يزحلق نور

- ايه ده هو كل يوم تلفزيون مفيش حاجة تانية (ياخذ الريموت ويبدا التقليب) نور يصيح ويتنطط ويبكي (بابا مستمر في التقليب)

* مش انا اللي فتحته الاول يبقى انا الي امسك الريموت

- انا عايز اشوف القاهرة اليوم

* انا بقى مش عايز اشوف عمرو اديب ده انا عايز الفيلم

- كلامي هو اللي هيمشي ، نوووررررررررررررر

* (نور يبكي بكاء مرا ) هو مش بيته لوحده انا عايز اتفرج على التلفزيون 

/( احتج شوية بقى ) ينفع كده؟؟؟

- ايه ده هو هيمشي كلامه علي ولا ايه؟ (نور يبكي ابو نور مصر على موقفه ذياد يشاهد الموقف ويحاول ان يفهم ما ينتظره وما هي الاستراتيجيات التي يجب اتخاذها في المواقف المشابهة)  ربع ساعة نور خطف الريموت وقلب القناة وجري 

- انت يا ولد (صاح ابو نور بعلو الصوت) نور اختفى 

/ نور ادي الريموت لبابا يا حبيبي يالله بقي انا زهقت من المشاكل دي

* خليه يجيب على الفيلم

- والله يا كلب ما فيه تلفزيون اصلا ، هيه(يغلق التلفزيون)

*( نور يضحك)احسن ، علشان ما تشوفش عمرو اديب صاحبك!!!

- ابو نور يفتح التلفزيون تاني على القاهرة اليوم ، نور يذهب لخطف الريموت بابا يلحق ويبعده (خناقة) يتراجع بابا (القاهرة اليوم لسه شغالة) بص يا نور (بهدوء) انا باحب اتفرج على البرنامج ده سيبني بقى انا طول النهار بره وعايز اتفرج شوية

*(يسحب ناعم جدا جدا) ماشي يا بابا يا حبيبي بس بص احنا نتفق اللي يفتحه الاول يبقى الريموت معاه ومحدش يقول له هات الريموت ماشي؟

- ماشي يا حبيبي

*طيب ما انا اللي فتحته يا بابا وانتا جيت لقتني باتفرج

- (الصبر خلص) وبعديييييييين بقى معاك؟؟؟

* طب خلاص من بكرة اللي يفتحه الاول محدش ياخد منه الريموت؟

-ماشي يا عم

مشهد 10000

(زعيق لرب السما على من ياخذ الريموت وعلى اي قناة يتفرج الجميع) تيته تخبط على الباب

* (نور بسرعة وبصياح يفتح الباب  وقبل ان تقول اي شىء) شوفتي ابنك عامل في ايه؟ مش عايز يديني الريموت 

= ليه يا ابو نور (هي تنادي ابنها كده!!) ما تزعلوش يا ابو نور

- ماشي يا كلب انت بتشتكيني لامي؟؟

= لا لا ولا شكوي ولا حاجة وبعدين يا نور تعال يا حبيبي فوق وانا اجيب لك اللي انت عايزة

* ماشي يا تيته (موجها كلامه لابيه) انا هاطلع ولما انزل هاغير القناة برضة!!! 

مشهد 20000

* (نور ادرك انه يجب التوصل لصيغة للتعايش في ظل وجود ريموت واحد بالبيت)

* بابا انت يتحب عمرو اديب والجزيرة ماشي بس بقى لما يخلصوا انا بقى اقلب على اللي انا عاوزة

-ماشي يا نور بش بلاش افلام وبلاش سهر وتسمع الكلام

*ماشي يا بابا يا حبيبي ياله افتح لي التلفزيون على زكي شان

- لأ الوقتي انا عايز 90 دقيقة

* يا بابا الحاجات دي ما باحبهاش

- ما حدش قال لك تحبها!!

* يعني ايه بقى طيب انا عندي حل للمشكلة دي اشتري لي تلفزيون في اوضتي لوحدي وكده بقى ما نتشاكلش كل يوم وتتفرج على اللي انت عاوزه وانا كمان اتفرج على اللي عاوزة!! تلفزيون صغير كده!!!

- (لا تعليق) وما زالت المشاهد مستمرة

 يا سلام على فايزه لما تبقا عايزه ....مين فايزه دى بأه ؟؟؟؟؟  هى حكومتنا الموقره لما تكون ناويه ترفع من شأن انسان بترفعه اوى بس يكون واسطه او توصيه  مش اى حد طبعاا...........الموضوع ان الفنانه امال ماهر المطربه ال بتغنى .. الحقيقه ان صوتها وادائها رائعين  علشان كده لما ظهرت باول مره للغناء تم تنبيه من رئيس الجمهوريه برعايتها والاهتمام بيها ....تعمل ايه وزارة الاعلام علشان توصية رئيس الجمهوريه تصرف على المطربه 20 مليون جنيه اشى فساتين واشى الحان واشى كلمات   الخ   الخ   الخ  ...؟؟؟؟؟؟؟  الله طيب ما ام كلثوم بعظمتها وال مكانتها وصيتها ذاع بالعالم كله مش الشرق بس محدش صرف عليها خمسين قرش حتى تقوم وزاره الاعلام  تصرف 20 مليون جنيه على مغنيه فى ظل الازمات والمشاكل ال بيعانيها الناس...؟ ده الفلوس دى كانت عملت كم مصنع شغل الاف الشباب العاطلين وال بيرموا نفسهم للسمك فى سواحل ايطاليا او تركيا او يجوزوا شباب وبنات مش عارفين يتجوزوا او يعملوا اى شىء لشبابنا الغلابه ....وبعدين لما المطربه امال ماهر مع احترامى الشديد لموهبتها بيتصرف عليها 20 مليون امال المطربه ال بتبوس الواوا وتخلى الواوا تصح لو صرفوا عليها هيصرفوا عليها كم؟؟ اكيد هتفرق طبعا كتير...؟؟؟ يا جماعه حرام حتى الناس تقرا حاجات زى كده وهى تعبانه بحياتها انا متهيالى التصريحات دى استفزاز لمشاعر المواطنين المصريين واستنكار لحقوقهم وادميتهم ..20 مليون على حفلات وفساتين ليه يعنى هى هتوصلنا لحل ازمه فلسطين مع اسرائيل ولا هتخلى امريكا تغور من العراق ولا هتحل ازمه دارفور ولا هتحل ازمه المواطن المصرى ال بيعانيها من ايام محمد على للوقت الحالى ..دى مطربه زى اى مطربه موهبتها هى ال هتفرض نفسها ولا يعنى علشان متوصى عليها ...اه يا فايزه لما تبقى عايزه.......وتحياتى ليكم